पुणे : पुण्यातून एक मोठी बातमी समोर येत आहे. कुख्यात गुंड शरद मोहोळ याच्यावर गोळीबार केल्याची घटना घडली आहे. पुण्यातील कोथरूडमधील सुतारदरा परिसरात हा गोळीबार झाल्याची प्राथमिक माहिती आहे. गुंड शरद मोहोळ याला तीन गोळ्या लागल्या असून तो गंभीर जखमी झाला आहे. या घटनेनंतर घटनास्थळी पोलीस दाखल झाले आहेत. घटनेने पुण्यात एकच खळबळ माजली आहे.
मिळालेल्या अधिक माहितीनुसार, कुख्यात गुंड शरद मोहोळ याच्यावर पुण्यातील कोथरूड परिसरात गोळीबार करण्यात आला आहे. कोथरूड परिसरातील सुतारदरा या ठिकाणी शरद मोहोळ जात असताना दुचाकीवरून आलेल्या अज्ञात आरोपींनी शरद मोहोळ यांच्या दिशेने तीन गोळ्या झाडल्या. त्यातील एक गोळी शरद मोहोळ यांचा खांद्याला लागली. या चकमकीत शरद मोहोळ गंभीर जखमी झाला आहे.
यानंतर गुंड मोहोळ याला कोथरूड परिसरातीलच एका खाजगी रुग्णालयात दाखल करण्यात आलं असून त्याच्यावर उपचार सुरू आहेत. आज दुपारी दीड वाजण्याच्या सुमारास हा प्रकार घडला आहे. या घटनेनंतर आरोपी पसार झाले आहेत. घटनेची माहिती मिळताच कोथरूड पोलिसांचे पथक घटनास्थळी दाखल झाले असून अधिक तपास करत आहेत
