पिंपरी-चिंचवड : पिंपरी-चिंचवडमध्ये एकाच दिवशी सात जणांनी आपली जीवन यात्रा संपवली असल्याची नोंद करण्यात आली आहे. गौरव अगम (वय वर्षे 28) या तरुणाने खिडकीतून भिंतीला आलेल्या लोखंडी ब्रकेटला ओढणीच्या साह्याने गळफास घेऊन आत्महत्या केल्याची धक्कादायक घटना घडली आहे. ही घटना चाकण पोलिस ठाण्याच्या हद्दीत सोमवारी (दि. 27) सकाळी साडेदहाच्या सुमारास उघडकीस आली. तसेच दुसऱ्या घटनेत प्रसाद संजय अवचट (31, रा. पुनावळे) याने सोमवारी (दि. 27) दुपारी साडेचारच्या सुमारास गळफास घेऊन आत्महत्या केल्याची धक्कादायक घटना समोर आली आहे.
तिसऱ्या घटनेमध्ये विकास मुरगुंड (35) यांनी भोसरीतील गणपत लांडगे चाळीत साडीच्या साह्याने गळफास घेत आपल्या आयुष्याचा शेवट केला. ही घटना सोमवारी (दि. 27) दुपारी बाराच्या सुमारास समोर आली आहे. चौथ्या घटनेत मनाप्पा चव्हाण (52, रा. शिंदेवस्ती, नेरे, ता. मुळशी) यांनी घराशेजारील लिंबाच्या झाडाला डोक्याच्या पटक्याने गळफास घेऊन आपली जीवन यात्रा संपवली.
पाचव्या घटनेत सुवर्णा श्रीराम पवार (36, रा. ढोरेनगर, जुनी सांगवी) या महिलेने घरात छताच्या पंख्याला गळफास घेऊन आत्महत्या केली. रात्री ही घटना उघडकीस आली आहे. सहाव्या घटनेत नवनाथ पवार (46, रा. थेरगाव) यांनी घराच्या बेडरूममध्ये बेडशीटच्या साह्याने गळफास घेतला. चिखली परिसरात घराच्या इमारतीच्या आठव्या मजल्यावरून उडी मारून दिनेश सुरेश लोखंडे (40, रा. चिखली) या व्यक्तीने आत्महत्या केली. ही घटना रविवारी (दि. 26) रात्री पावणेआठच्या सुमारास घडली आहे. आत्महत्येचे कारण अद्याप अस्पष्ट आहे. या सर्व घटनांनी शहरात एकच खळबळ उडाली आहे.
