पुणे: व्यवसायाच्या निमित्ताने परदेशात जाण्याच्या तयारीत असलेल्या एका व्यक्तीला भरदिवसा चोरट्यांनी गंडा घातल्याची धक्कादायक घटना समोर आली आहे. लोणी काळभोर परिसरात एका अनोळखी चोरट्याने कारची काच फोडून तब्बल पाच लाख रुपयांची रोख रक्कम लंपास केली आहे. याप्रकरणी काळेपडळ पोलिस ठाण्यात गुन्हा दाखल करण्यात आला आहे.
फिर्यादी सौरभ सुभाष धुमाळ (वय ३२, रा. कुंजीरवाडी, धुमाळमळा) हे व्यवसायासाठी लवकरच जर्मनीला जाणार आहेत. त्यासाठी आवश्यक असलेल्या पैशांची जमवाजमव करण्यासाठी ते ६ जून रोजी बँकेत गेले होते. बँकेतून त्यांनी ५ लाखांची रोकड काढली व ती स्वतःच्या कारच्या डॅशबोर्डमध्ये ठेवली.
त्यांनंतर दुपारी साधारण ३ वाजण्याच्या सुमारास, पुणे-सोलापूर महामार्गावरील कुंजीरवाडी फाटा परिसरात असलेल्या एका मिसळ केंद्राजवळ त्यांनी आपली कार पार्क केली. कार लॉक करून ते नाश्ता करण्यासाठी दुकानात गेले. काही वेळातच एका अज्ञात चोरट्याने त्यांच्या कारची ड्रायव्हर साईडची काच फोडली आणि डॅशबोर्डमध्ये ठेवलेली संपूर्ण पाच लाख रुपयांची रक्कम घेऊन पसार झाला.
हा प्रकार लक्षात येताच सौरभ धुमाळ यांनी तात्काळ काळेपडळ पोलिस ठाण्यात धाव घेतली आणि घटनेची सविस्तर माहिती दिली. पोलिसांनी अज्ञात आरोपीविरुद्ध गुन्हा दाखल केला असून, सीसीटीव्ही फुटेजच्या आधारे पोलीस तपास सुरू आहे. या घटनेमुळे परिसरात भीतीचे वातावरण निर्माण झाले असून, कारमधून रोख रक्कम ठेवण्याची सवय किती धोकादायक ठरू शकते, याचा प्रत्यय या घटनेतून आला आहे. पोलिसांनी नागरिकांना अशा बाबतीत अधिक सावध राहण्याचे आवाहन केले आहे.
