पुणे : बारामतीत पोटदुखीवर उपचारासाठी गेलेल्या एका महिलेने डॉक्टरवर विनयभंगाचा गंभीर आरोप केला आहे. याप्रकरणी बारामती शहर पोलिसांनी संबंधित नामांकित मल्टिस्पेशालिटी हॉस्पिटलमधील डॉक्टरविरोधात गुन्हा दाखल केला आहे.
मिळालेल्या माहितीनुसार, 19 ऑक्टोबर रोजी पीडित महिला पोटदुखीच्या त्रासामुळे रुग्णालयात गेली होती. तिथे सलाईन लावल्यानंतर ते संपल्यावर डॉक्टरांनी तिला केबिनमध्ये बोलावले. यावेळी महिलेसोबत तिचा लहान मुलगाही होता. तपासणीनंतर डॉक्टरने तिला पाठीचे काही व्यायाम करण्यास सांगितले. व्यायाम सुरू असताना डॉक्टर वारंवार जवळ येत असल्याचे महिलेचे म्हणणे आहे. तिने अंतर ठेवण्यास सांगितल्यानंतरही डॉक्टर पुन्हा जवळ आले आणि हात मागे ताणत असताना त्यांनी महिलेच्या कमरेला हात लावून ‘छातीत धडधड होत आहे का?’ अशी विचारणा केली. या गैरवर्तनामुळे घाबरलेली महिला औषधे घेऊन घरी परतली.
घरी आल्यावर घडलेल्या प्रकारामुळे महिलेला मोठा मानसिक त्रास झाला. पुढे दसऱ्याच्या दिवशी त्या डॉक्टरांनी तिला व्हॉट्सॲपवर शुभेच्छांचा संदेश पाठवला. त्यावेळी संधी साधून महिलेने त्यांना त्या दिवशीच्या वागणुकीबद्दल जाब विचारला. यावर डॉक्टरने आपली चूक मान्य करत माफी मागितली आणि ‘पुन्हा असे घडणार नाही’ असा मेसेज पाठवला, असा दावा तक्रारीत करण्यात आला आहे.
नोकरीनिमित्त बाहेर गावी असलेले तिचे पती बारामतीत परतल्यानंतर तिने घडलेला सर्व प्रकार त्यांना सांगितला. त्यानंतर पतीसोबत जाऊन तिने शुक्रवारी पोलिसांत अधिकृत तक्रार नोंदवली. महिलेच्या या तक्रारीवरून पोलिसांनी गुन्हा दाखल केला असून, पोलीस सध्या या प्रकरणाचा पुढील तपास करत आहेत.
