पुणे : महाराष्ट्रातील मुंबई, पुणे आणि नागपूर या प्रमुख शहरांमधील काही मेट्रो स्थानकांची नावे बदलण्याचा विचार राज्य सरकार करत आहे. प्रवाशांसाठी ही एक अत्यंत महत्त्वाची अपडेट असून, या संपूर्ण प्रक्रियेवर लक्ष ठेवण्यासाठी आणि योग्य निर्णय घेण्यासाठी शासनाने एका विशेष समितीची स्थापना केली आहे.

या नामकरणामागे केवळ नावे बदलणे हा उद्देश नसून, त्या ठराविक भागाचा ऐतिहासिक वारसा, भौगोलिक ओळख आणि स्थानिक संस्कृती जपण्याचा प्रयत्न केला जाणार आहे. स्थानिक रहिवाशांच्या भावना आणि त्यांच्या सूचनांचाही यामध्ये आवर्जून विचार होईल. नवीन नावे ही सर्वसामान्यांना समजायला आणि बोलायला सोपी असावीत, तसेच एकाच नावामुळे प्रवाशांचा गोंधळ उडू नये, याची विशेष काळजी घेतली जाणार आहे. यासोबतच, नावावरून कोणताही धार्मिक किंवा राजकीय वाद निर्माण होऊ नये, असे स्पष्ट नियम समितीसाठी घालून देण्यात आले आहेत.
या प्रक्रियेची सुरुवात मेट्रो प्रकल्प चालवणाऱ्या संस्थांकडून होईल. या संस्था सर्वप्रथम संभाव्य नावांचा प्रस्ताव राज्य सरकारकडे सादर करतील. त्यानंतर नगरविकास विभाग हा प्रस्ताव या नवीन समितीपुढे ठेवेल. मुख्यमंत्री देवेंद्र फडणवीस हे या समितीचे अध्यक्ष असतील, तर नगरविकास विभागाचे उपमुख्यमंत्री सह-अध्यक्ष म्हणून काम पाहतील. संबंधित भागातील लोकप्रतिनिधी म्हणजेच खासदार, आमदार आणि स्थानिक स्वराज्य संस्थांचे सदस्यही या समितीत सहभागी असतील, तर मेट्रो संस्थांचे प्रमुख सदस्य सचिव म्हणून जबाबदारी पार पाडतील.

ही समिती आलेल्या प्रस्तावांचा सखोल अभ्यास करून योग्य नावांची शिफारस केंद्र सरकारकडे करेल. अंतिम मंजुरीसाठी हा प्रस्ताव केंद्राकडे पाठवला जाईल. सध्या तरी कोणत्या नेमक्या स्थानकांची नावे बदलली जाणार आहेत, याबद्दल कोणतीही अधिकृत यादी जाहीर झालेली नाही. समितीच्या शिफारशी आणि केंद्र सरकारच्या अंतिम मोहोरनंतरच याबद्दलची सविस्तर माहिती प्रवाशांसमोर येईल.






