लोणी काळभोर, (पुणे) : मांजरी (ता. येथील) पोदार इंटरनॅशनल स्कूल येथे शिवजयंती मोठ्या उत्साहात साजरी करण्यात आली. या कार्यक्रमात विद्यार्थ्यांनी विविध सांस्कृतिक कार्यक्रम सादर करून छत्रपती शिवाजी महाराजांच्या शौर्याला अभिवादन केले.
कार्यक्रमाची सुरुवात पारंपरिक पद्धतीने शिवरायांच्या प्रतिमेला पुष्पहार अर्पण करून व दीपप्रज्वलनाने झाली. यानंतर इयत्ता पहिलीच्या विद्यार्थ्यांनी शिवाजी महाराजांच्या पाळण्याचा नृत्याविष्कार सादर केला. त्यानंतर इयत्ता दुसरीच्या श्रेया मोरे व इयत्ता पहीलीची देवांशी शेटे यांनी भाषण करून शिवरायांचे पराक्रम व त्यांच्या विचारांची महत्ता पटवून दिली.
कार्यक्रमात इयत्ता पहिलीचा विद्यार्थी अधव अनिश याने एकल अभिनय सादर केला. या अभिनयात त्याने छत्रपती शिवाजी महाराज आणि तानाजी मालुसरे यांच्या व्यक्तिरेखा साकारत उपस्थितांची मने जिंकली. या प्रयोगातून शिवरायांचे स्वराज्यस्थापनेचे स्वप्न आणि तानाजी मालुसरे यांचे बलिदान यांचा प्रभावी संदेश दिला. यानंतर विद्यार्थ्यांनी शिवरायांच्या बालपण आणि आजच्या पिढीच्या बालपणातील फरक दर्शविणारा नाट्यप्रयोग सादर केला. या नाटकातून मुलांना शिवरायांच्या शिस्तबद्ध आणि ध्येयवादी जीवनशैलीचे महत्व पटवून देण्यात आले.
दरम्यान, शाळेच्या मुख्याध्यापिका मीनल वैद्य, शिक्षकवृंद आणि पालकांनी विद्यार्थ्यांच्या या सादरीकरणाचे कौतुक केले. कार्यक्रमाचा शेवट महाराष्ट्र राज्यगीत आणि राष्ट्रगीताने समारोप करण्यात आला. संपूर्ण कार्यक्रम विद्यार्थ्यांच्या योगदानाने यशस्वी झाला व प्रत्येकाच्या मनात शिवरायांप्रती आदरभाव निर्माण झाला.
