बारामती : आगामी लोकसभा निवडणुकीच्या पार्श्वभूमीवर उमेदवार सुप्रिया सुळे यांच्या प्रचारार्थ शरद पवार यांनी बारामतीमध्ये विविध मेळाव्यांचे आयोजन केले होते. पैकी व्यापाऱ्यांचा मेळावा अचानक रद्द झाला. आम्हाला मेळाव्याला येणे शक्य नसल्याचे पत्र व्यापाऱ्यांनी दिल्यानंतर या घटनेची चर्चा झाली. रद्द झालेल्या व्यापारी मेळाव्यासंदर्भात ज्येष्ठ नेते शरद पवार यांनी वक्तव्य केले. त्यानंतर आता त्यांच्याच उपस्थितीमध्ये व्यापारी मेळावा घेण्याचा निर्णय बारामती येथील व्यापाऱ्यांनी घेतला आहे. २२ मार्च रोजी संध्याकाळी सात वाजता बारामतीतील श्री महावीर भवन या ठिकाणी मेळाव्याचे आयोजन केल्याची माहिती देण्यात आली.
आम्हाला मेळाव्याला येणे शक्य नसल्याचे पत्र व्यापाऱ्यांनी दिल्यानंतर ज्येष्ठ नेते शरद पवार यांच्या उपस्थितीत बारामती शहरात सोमवारी होणारा व्यापाऱ्यांचा मेळावा रद्द करण्यात आला होता. ‘पूर्वी असे कधी घडले नव्हते’, अशा शब्दांत शरद पवार यांनी नाराजी व्यक्त केली. दुसरीकडे हा मेळावा रद्द करण्यासाठी बड्या नेत्याचा दबाव होता, अशी कुजबूज बारामतीत सुरू झाली. दरम्यान, व्यापाऱ्यांशी त्यांच्या प्रश्नांसाठी मी अनेक वेळा चर्चा केली, परंतु ‘आम्हाला जमणार नाही’ असे गेल्या पन्नास वर्षांत त्यांनी कधीच कळवले नव्हते. हे पहिल्यांदा घडले. त्यांना बहुधा कशाचीतरी चिंता वाटत असावी. त्यामुळे कार्यक्रम न घेतलेला बरा, असे त्यांना वाटले असावे. त्यांनी समोरच्याचे ऐकूनही घ्यायचे नाही असे ठरवले, त्याची मला खंत वाटते, असा तपशील शरद पवार यांनी वकिलांच्या मेळाव्यात उघड केला होता.
दरम्यान हा मेळावा रद्द केलेला नव्हता, तर तीन दिवसांत सर्व व्यापाऱ्यांपर्यंत निरोप जाणे शक्य नव्हते या मेळाव्याला व्यापाऱ्यांची पुरेशी उपस्थिती राहिली नसती त्यामुळे मेळावा नंतर घेण्याचे ठरले होते, असा खुलासा व्यापारी बांधवांनी केला. कम्युनिकेशन गॅप झाल्यामुळे गैरसमज निर्माण झाला असेही यावेळेस नमूद करण्यात आले.ज्येष्ठ नेते शरद पवार यांच्या बद्दल आदराचीच भावना असल्याचेही व्यापाऱ्यांनी यावेळी सांगितले. 22 मार्च रोजी संध्याकाळी सात वाजता बारामतीतील श्री महावीर भवन या ठिकाणी मेळाव्याचे आयोजन केल्याची माहिती देण्यात आली.
शरद पवारांच्या वक्तव्यानंतर माजी नगराध्यक्ष जवाहर शहा वाघोलीकर यांच्या निवासस्थानी व्यापारी मेळाव्याबाबत पदाधिकाऱ्यांची तातडीची बैठक झाली. राष्ट्रवादी काँग्रेस शरदचंद्र पवार पक्षाचा व्यापारी मेळावा २२ मार्चला आयोजित करण्यात येणार आहे, असे जवाहर शहा यांनी स्पष्ट केले. यापूर्वी व्यापारी मेळाव्याबाबत नियोजित बैठक घेऊन निर्णय वेळेत न झाल्यामुळे मेळाव्याला उशीर झाला, असेही त्यांनी सांगितले.
या बैठकीला माजी नगराध्यक्ष सदाशिव सातव, माजी नगरसेवक सुभाष ढोले, राहुल शहा वाघोलीकर, बारामती मर्चंट असोसिएशनचे अध्यक्ष संभाजी कर्वे, व्यापारी महासंघाचे अध्यक्ष सुशील सोमानी, नरेंद्र गुजराती, स्वप्नील मुथा, शैलेश साळुंखे, धवल वाघोलीकर उपस्थित होते.
