लोणी काळभोर : कोलवडी (ता. हवेली) येथील शिवशक्ती विविध कार्यकारी सेवा सहकारी सोसायटीच्या अध्यक्षपदी शरद रामदास गायकवाड यांची तर उपाध्यक्षपदी चंद्रकांत किसन गायकवाड यांची बिनविरोध निवड करण्यात आली.
मावळते अध्यक्ष अमर बाळासाहेब गायकवाड व उपाध्यक्ष चंद्रकांत प्रभू गायकवाड यांनी आपल्या पदाचा राजीनामा दिल्याने सदर पद रिक्त झाले होते. अध्यक्ष व उपाध्यक्ष पदासाठी निवडणूक प्रक्रिया सोसायटीच्या कार्यालयात नुकतीच पार पडली. ही निवडणूक प्रक्रिया निर्णय अधिकारी एस.एन. देसाई यांच्या मार्गदर्शनाखाली पार पडली. या निवडणुकीत अध्यक्षपदी शरद गायकवाड व उपाध्यक्षपदी चंद्रकांत गायकवाड यांची सर्वानुमते बिनविरोध निवड करण्यात आली. तर सोसायटीचे सचिव दत्तात्रय गायकवाड व संतोष चौधरी यांनी निवडणुकीचे शासकीय कामकाज पाहिले.
यावेळी यशवंत सहकारी साखर कारखान्याचे माजी संचालक रामदास गायकवाड, माजी संचालक अशोक गायकवाड, पुणे कृषी उत्पन्न बाजार समितीचे संचालक शशिकांत गायकवाड, माजी सरपंच सतीश गायकवाड, बाळासो भाडाळे, मल्हारी गायकवाड, सदाशिव गायकवाड, सोसायटीचे संचालक आदी मान्यवर उपस्थित होते. या कार्यक्रमाचे आभार अशोक गायकवाड यांनी मानले.
आगामी काळात संस्थेचा कारभार पारदर्शकपणे करणार
यावेळी बोलताना नवनिर्वाचित अध्यक्ष शरद गायकवाड म्हणाले की, “आगामी काळात संस्थेचा कारभार पारदर्शकपणे करणार आहे. शेतकऱ्यांना त्वरित पिक कर्जपुरवठा देणे, मध्यम मुदत कर्ज वाटप सुरु करणे व कर्ज पूर्ण भरलेल्या सभासदांना पुन्हा कर्ज उपलब्ध करून देणार आहे. तसेच संचालक मंडळ आणि सर्व सदस्यांना विश्वासात घेऊन संस्थेचा विकास करण्यासाठी प्रयत्न करणार आहे”.
