लोणी काळभोर : घरात कोणालाही काही न सांगता एक रिक्षाचालक बेपत्ता झाल्याची घटना घडली आहे. हि घटना कदमवाकवस्ती (ता. हवेली) ग्रामपंचायत हद्दीतील घोरपडे वस्ती परिसरात घडली आहे. रिक्षाचालक एक महिन्यांपासून बेपत्ता झाल्याचे कारण अद्याप समोर आले नसले तरी, त्याला शोधण्याचे लोणी काळभोर पोलिसांसमोर आव्हान उभे राहिले आहे.
करण पांडुरंग जगताप (वय-२३) असे बेपत्ता झालेल्या तरुणाचे नाव आहे. याप्रकरणी त्याची पत्नी कोमल करण जगताप (वय-२४, रा. घोरपडे वस्ती, आंबिका माता मंदिराजवळ, लेन नं. ११, कदमवाकवस्ती, ता. हवेली) यांनी लोणी काळभोर पोलीस ठाण्यात खबर दिली आहे.
पोलिसांनी दिलेल्या माहितीनुसार, करण जगताप हा रिक्षाचालक असून तो रिक्षा चालवून कुटुंबाचा उदरनिर्वाह करतो. दरम्यान, करण हा २ जून ला सकाळी दहा वाजण्याच्या सुमारास कोणालाही काही न सांगता घरातून निघून गेला, तो परत घरी आलाच नाही. याप्रकरणी कोमल जगताप यांनी लोणी काळभोर पोलीस ठाण्यात खबर दिली आहे. त्यानुसार पोलीस ठाण्यात मिसिंग केस दाखल करण्यात आली आहे.
दरम्यान, करण जगताप हा बेपत्ता झाल्याचे कारण अद्याप समोर आलेले नाही. मात्र मिसिंग दाखल झाल्यापासून पोलीस त्याच्या शोधात आहेत. पुढील तपास लोणी काळभोर पोलीस ठाण्याचे पोलीस हवालदार योगेश कुंभार करीत आहेत.
पोलिसांचे नागरिकांना आवाहन
रंग सावळा, अंगाने मध्यम, उंची १६५ से. मी, चेहरा उभट, नाक सरळ, केस काळे, अंगात पिवळ्या रंगाचा शर्ट व काळया रंगाची जिन्स पॅन्ट अशा वर्णनाचा तरुण आढळल्यास नागरिकांनी लोणी काळभोर पोलिसांशी ९९२३१०७१४८ या नंबरवर संपर्क करावे. असे आवाहन लोणी काळभोर पोलीस ठाण्याचे वरिष्ठ पोलीस निरीक्षक शशिकांत चव्हाण यांनी केले आहे.
