पुणे: पुण्यातील तापलेल्या (Ravindra Dhangekar) राजकीय वातावरणात (Pune News) उपमुख्यमंत्री एकनाथ शिंदे यांच्या शिवसेनेचे पुणे महानगर प्रमुख रवींद्र धंगेकर यांच्या अडचणीत वाढ होण्याची शक्यता निर्माण झाली आहे. भाजप नेते चंद्रकांत पाटील यांचे निकटवर्तीय व्यावसायिक समीर पाटील यांनी धंगेकर यांच्याविरुद्ध क्रिमिनल मानहानीचा खटला आणि दिवाणी दावा दाखल केला असून, या प्रकरणामुळे धंगेकर यांच्या राजकीय कारकीर्दीला मोठा धक्का बसू शकतो.
धंगेकर यांनी गेल्या काही दिवसांपासून मंत्री चंद्रकांत पाटील आणि त्यांचे सहयोगी समीर पाटील यांच्यावर गंभीर आरोपांची मालिका केली होती. निलेश घायवळ या कुख्यात गुंडाशी संबंधित प्रकरणात धंगेकर यांनी समीर पाटील यांच्यावर मकोका अंतर्गत कारवाई झाल्याचा आणि गुंडांशी साटेलोटे असल्याचा दावा केला होता. या आरोपांसाठी त्यांनी काही फोटो आणि माहिती दिली होती. मात्र, त्या पुराव्यांचा कोणताही ठोस आधार नसल्याचा दावा समीर पाटील यांनी केला आहे.
समीर पाटील यांनी पत्रकार परिषदेत सांगितले की, “धंगेकर यांच्या निराधार वक्तव्यांमुळे माझ्या प्रतिमेला आणि व्यवसायाला मोठा फटका बसला आहे. राजकीय लाभासाठी माझी प्रतिष्ठा घालवण्याचा प्रयत्न केला जात आहे. मी सर्व पुरावे न्यायालयासमोर सादर करीन आणि धंगेकर यांना जबाबदार धरले जाईल. जोपर्यंत ते माफी मागत नाहीत किंवा 50 कोटी रुपये भरत नाहीत, तोपर्यंत मी माघार घेणार नाही.”
या पार्श्वभूमीवर समीर पाटील यांनी 14 ऑक्टोबर रोजी धंगेकर यांना 50 कोटी रुपयांची अब्रुनुकसानीची नोटीस पाठवली होती. आता त्यांनी या प्रकरणात पुणे जिल्हा न्यायालयात क्रिमिनल आणि दिवाणी दोन्ही खटले दाखल केले आहेत.
दरम्यान, महायुतीत असूनही रवींद्र धंगेकर हे मित्रपक्षांवर सातत्याने टीका करत आहेत. एकनाथ शिंदे यांनी त्यांना “दंगे बंद करा” अशा सूचना दिल्यानंतरही त्यांनी आक्रमक भूमिका कायम ठेवली आहे. त्यामुळे महायुतीतील संबंध ताणले जाऊ शकतात, आणि पक्षांतर्गत कारवाईची शक्यता नाकारता येत नाही.
या घडामोडींचा आगामी महापालिका निवडणुकांवर परिणाम होण्याची शक्यता राजकीय वर्तुळात व्यक्त केली जात असून, धंगेकर यांना आता राजकीय आणि कायदेशीर अशा दोन्ही लढाया एकाचवेळी लढाव्या लागणार आहेत.
