पुणे : लग्नाच्या आमिषाने एका महिलेवर पोलीस उपनिरीक्षकाने बलात्कार केल्याचा धक्कादायक प्रकार उघडकीस आला आहे. याप्रकरणी मार्केट यार्ड पोलीस ठाण्यातील पोलीस उपनिरीक्षकावर गुन्हा दाखल करण्यात आला आहे. तसेच महिलेला जातीवाचक शिवीगाळ करून जीवे मारण्याची धमकी दिल्याप्रकरणी उपनिरीक्षकाच्या पत्नीविरुद्ध गुन्हा दाखल करण्यात आला आहे. युवराज वामन शिंदे असं गुन्हा दाखल झालेल्या पोलीस अधिकाऱ्याच नाव आहे.
याप्रकरणी मार्केट यार्ड पोलीस ठाण्यातील उपनिरीक्षक युवराज वामन शिंदे, तसेच त्याची पत्नी काजल यांच्याविरुद्ध गुन्हा दाखल करण्यात आला आहे. याबाबत एका महिलेने स्वारगेट पोलीस ठाण्यात फिर्याद दिली आहे. तक्रारदार महिलेची उपनिरीक्षक शिंदे याच्याशी ओळख झाली होती.
शिंदे याने महिलेला विवाहाचे आमिष दाखवून तिला सातारा रस्त्यावर एका हॉटेलमध्ये नेले. तेथे त्याने तिच्यावर बलात्कार केला. महिलेचा विश्वास संपादन करून तिच्याकडून वेळोवेळी महागड्या भेटवस्तू देखील घेतल्या. महिलेने विवाहाबाबत विचारणा केल्यानंतर शिंदेने तिला नकार दिला.
यानंतर महिलेने जाब विचारल्यानंतर शिंदेच्या पत्नीने जातीवाचक शिवीगाळ केली. महिलेला जीवे मारण्याची धमकी देखील दिली. महिलेने मार्केट यार्ड पोलीस ठाण्यात तक्रार दिली. त्यानंतर संबंधित गुन्हा तपासासाठी स्वारगेट पोलीस ठाण्यात तपासासाठी सोपविण्यात आला आहे. स्वारगेट विभागाचे सहायक पोलीस आयुक्त नारायण शिरगावकर अधिक तपास करत आहेत.
