पुणे : पुण्यातील वडगाव शेरीत बाप लेकीच्या नात्याला काळिमा फासणारी धक्कादायक घटना उघडकीस आली आहे. एका बापानेच स्वतःच्या 16 वर्षाच्या अल्पवयीन मुलीवर सातत्याने अत्याचार केल्याचा प्रकार समोर आहे. हा प्रकार 2018 ते 22 मार्च या कालावधीत घडला आहे. याप्रकरणी चंदननगर पोलिसांनी नराधम बापावर गुन्हा दाखल करुन अटक केली आहे. याबाबत 16 वर्षाच्या पीडित मुलीने चंदननगर पोलीस ठाण्यात फिर्य़ाद दिली आहे. यावरून 40 वर्षीय बापावर गुन्हा दाखल करुन अटक केली आहे.
पोलिसांनी दिलेल्या माहितीनुसार, आरोपी बाप ड्रायव्हर असून त्याने स्वत:च्या 16 वर्षाच्या अल्पवयीन मुलीवर वारंवार बलात्कार केला. आरोपी बापाने पीडित मुलीला मारहाण करुन घरी कोणी नसताना वेळोवेळी शारीरिक संबंध ठेवले. तसेच तिला गोळ्या खायला दिल्या. मुलीने गोळ्या खाल्या नाही तर, तो जबरदस्तीने तिला गोळ्या खायला घालत होता.
तसेच याबाबत कोणाला काही सांगितले तर आई, बहिण आणि भावाला जीवे मारण्याची धमकी देत होता. या प्रकाराबाबत पोलिसांकडे तक्रार केली तर पोलिसांना मारुन टाकीन अशी धमकी आरोपीने दिली. शुक्रवारी सकाळी साडेआठच्या सुमारास आरोपीने पीडित मुलीवर अत्याचार केले. बापाकडून वारंवार होत असलेल्या अत्याचाराला कंटाळून तिने चंदननगर पोलीस ठाण्यात तक्रार दाखल केली. त्यावरून पोलिसांनी तात्काळ गुन्हा दाखल करुन नाराधम बापाला अटक केली आहे. पुढील तपास सहायक पोलीस निरीक्षक प्रशांत माने करत आहेत.
