Pune Traffic | पुणे : कोंढवा परीसरातील वाहतूक धारकांसाठी महत्वाची बातमी समोर आली आहे. परिसरात पाईपलाईन टाकण्याचे काम सुरु केल्यामुळे कोंढवा भागात वाहतूकीत काही स्वरूपात तात्पुरते बदल करण्यात आले आहेत. वाहतूक बदलाचे हे आदेश वाहतूक शाखेचे पोलीस उपायुक्त विजयकुमार मगर यांनी दिले आहेत.
या भागातील वाहनचालकांना पर्यायी मार्गांचा वापर करण्याचे आवाहन वाहतूक विभागाकडून करण्यात आले आहे. कोंढव्यातील संत गाडगे महाराज शाळा कोंढवा खुर्द ते भैरवनाथ मंदिर कोंढवा यादरम्यान पिण्याच्या पाण्याची पाईपलाईन टाकण्याचे काम सुरू करण्यात येत आहे. यानिमित्ताने हा बदल करण्यात आला आहे.
शितल पेट्रोल पंप चौकाकडून ज्योती हॉटेल चौकाकडे जाणारी सर्व वाहतूक बंद करण्यात आली आहे. तर ज्योती हॉटेल चौक ते शितल पेट्रोल पंप अशी एकेरी वाहतूक सुरू राहणार आहे. तसेच, वाहन चालकांनी पर्यायी मार्गानुसार शितल पेट्रोल पंप चौकाकडून ज्योती हॉटेल चौकाकडे जाणारी वाहतूक वेलकम हॉल जंक्शन, मेफेअर सोसायटी मार्गे सुरू राहणार आहे.
