Pune : पुणेकरांसाठी मुंबई-बंगळूर मार्गावर वंदे भारत स्लीपर एक्स्प्रेस सुरू करण्यास रेल्वे मंत्रालय यांनी मंजुरी दिली आहे. ही गाडी पुणे मार्गे धावणार असून प्रवासाचा वेळ सुमारे 5 तासांनी कमी होणार आहे.
सध्या पुणे ते बंगळूर प्रवासासाठी उद्यान एक्स्प्रेसला 18 तास 15 मिनिटे आणि कोईम्बतूर एक्स्प्रेसला 19 तास 20 मिनिटे लागतात. नव्या वंदे भारत स्लीपर एक्स्प्रेसमुळे हे अंतर सुमारे 13 तासांत पार केले जाणार आहे. ही गाडी पुणे, सोलापूर आणि वाडी मार्गे धावणार असून दौंड ते गुंटकलदरम्यानचा मार्ग ताशी 130 किमी वेगासाठी सक्षम करण्यात आला आहे.
या गाडीत प्रवाशांच्या सुरक्षिततेसाठी ‘कवच’ प्रणाली बसवण्यात आली आहे. तसेच आधुनिक शिड्या, कुशनिंग असलेले बर्थ, सेन्सर-आधारित प्रकाश व्यवस्था आणि बायो-व्हॅक्युम टॉयलेट्सची सुविधा देण्यात आली आहे.
गाडीमध्ये एकूण 16 डबे असतील. यामध्ये एसी थ्री टियरचे 11 डबे (611 बर्थ), एसी टू टियरचे 4 डबे (188 बर्थ) आणि एसी फर्स्ट क्लासचा 1 डबा (24 बर्थ) असेल. एकूण प्रवासी क्षमता 823 इतकी असेल.
ही गाडी आठवड्यातून 6 दिवस धावणार असून 1 दिवस देखभालसाठी राखीव असेल. मुंबई आणि बंगळूर येथून रात्री 9 च्या सुमारास प्रस्थान होणार आहे. गाडीची कमाल क्षमता ताशी 160 किमी असली तरी मार्गाच्या मर्यादेमुळे ती ताशी 130 किमी वेगाने धावेल.
