Pune : पुणे महानगरपालिका व ICLEI Local Governments for Sustainability, South Asia यांच्या संयुक्त विद्यमाने पुणे शहरातील ई-कचरा (E-Waste) व्यवस्थापन प्रणाली अधिक सक्षम, शाश्वत व परिणामकारक करण्यासाठी “Green Byte” प्रकल्प राबविण्यात येत आहे. या प्रकल्पाअंतर्गत पुणे महानगरपालिका आणि ICLEI दक्षिण आशिया संस्थेमध्ये कामाचा करारनामा करण्यात आला आहे.
पुणे शहराची लोकसंख्या सुमारे ७० ते ८० लक्ष असून शहरात माहिती-तंत्रज्ञान व इलेक्ट्रॉनिक उपकरणांचा वापर मोठ्या प्रमाणावर वाढला आहे. यामुळे लॅपटॉप, मोबाईल फोन, टीव्ही, वॉशिंग मशीन यांसारख्या उपकरणांमधून निर्माण होणाऱ्या ई-कचऱ्याचे प्रमाण सातत्याने वाढत आहे. ई-कचऱ्याचे योग्य संकलन, वर्गीकरण, पुनर्वापर व पर्यावरणपूरक विल्हेवाट न झाल्यास पर्यावरण व आरोग्यावर गंभीर परिणाम होण्याची शक्यता लक्षात घेता, ई-कचरा व्यवस्थापन प्रणाली अधिक सक्षम करण्याची आवश्यकता निर्माण झाली आहे.
हा उपक्रम महानगरपालिका आयुक्त नवल किशोर राम व अतिरिक्त आयुक्त (ज) पवनीत कौर यांच्या मार्गदर्शनाखाली राबविण्यात येत आहे. यामध्ये घनकचरा व्यवस्थापन विभागाचे मा. उपायुक्त अविनाश सकपाळ, सहाय्यक आयुक्त प्रज्ञा पोतदार-पवार तसेच ICLEI दक्षिण आशियाचे कार्यकारी संचालक इमानी कुमार व संचालक सौम्या चतुर्वेदुला सहभागी आहेत. औपचारिकीकरण, डेटा पारदर्शकता आणि बहु-भागधारक दृष्टिकोनातून पुण्याची ई-कचरा व्यवस्थापन परिसंस्था मजबूत करणे हा या “ग्रीन बाइट पुणे” उपक्रमाचा मुख्य उद्देश आहे. यासोबतच पुण्यातील घनकचरा व्यवस्थापन प्रणाली अधिक सक्षम करण्यासाठी ICLEI दक्षिण आशिया संस्थेमार्फत सल्लागार सहाय्य देखील देण्यात येणार आहे.
