Pune politics : पुण्याच्या राजकारणात सध्या अक्षरशः सस्पेन्स ड्रामा सुरू आहे. उपमुख्यमंत्री अजित पवार यांची राष्ट्रवादी काँग्रेस आणि शरद पवार यांच्या नेतृत्वाखालील राष्ट्रवादी काँग्रेस शरदचंद्र पवार हे दोन्ही गट पुण्यात एकत्र निवडणूक लढवणार, अशा जोरदार चर्चा गेल्या काही दिवसांपासून सुरू होत्या. इतकंच नाही तर जागावाटपावर दोन्ही बाजूंच्या नेत्यांची बैठकही झाली होती. (Pune politics)
मात्र अजित पवार गटाकडून जो प्रस्ताव मांडण्यात आला, तो शरद पवारांच्या राष्ट्रवादीला मान्य झाला नाही. त्यामुळेच शरद पवार गटाने थेट महाविकास आघाडीसोबत बोलणी सुरू केली, अशी माहिती समोर आली.
दोन दिवसांपूर्वी पुण्यातील एका हॉटेलमध्ये राष्ट्रवादी काँग्रेस शरदचंद्र पवार पक्ष, शिवसेना ठाकरे गट आणि काँग्रेसच्या नेत्यांची गुप्त बैठक झाली होती. या बैठकीला शरद पवार गटाचे नेते उपस्थित होते, हे समजताच राजकीय वर्तुळात अनेकांच्या भुवया उंचावल्या. त्यामुळे “आता शरद पवार अजित पवारांसोबत जाणार नाहीत” असा अंदाज बांधला जात होता.
पण आजच्या घडामोडींनी सगळं चित्रच बदलून टाकलं आहे. कारण महाविकास आघाडीच्या पुढील बैठकीला शरद पवार गटाचे नेते अनुपस्थित राहिले. त्यामुळे पुन्हा एकदा प्रश्न उभा राहतोय – दोन्ही राष्ट्रवादी पुन्हा एकत्र येणार का?
दरम्यान, आज बारामतीतही मोठ्या घडामोडी घडल्या. AI सेंटरच्या उद्घाटनानिमित्त उद्योगपती गौतम अदानी आज बारामती दौऱ्यावर होते. त्यांच्या स्वागतासाठी आमदार रोहित पवार विमानतळावर गेले होते. उपमुख्यमंत्री अजित पवार यांनीदेखील त्यांचं स्वागत केलं.
इतकंच नाही तर शरद पवार यांच्या निवासस्थानी गौतम अदानी यांच्यासाठी पवार कुटुंबीयांसह स्नेहभोजनाचाही कार्यक्रम झाला. त्याआधी झालेल्या जाहीर कार्यक्रमात शरद पवार, अजित पवार, सुनेत्रा पवार आणि खासदार सुप्रिया सुळे हे सगळे नेते एकाच मंचावर दिसले.
या सगळ्या घडामोडींमुळे राजकीय चर्चांना पुन्हा उधाण आलं आहे. बारामतीत दिसलेली एकजूट आणि पुण्यातील बदलती समीकरणं पाहता, दोन्ही राष्ट्रवादी एकत्र निवडणूक लढवण्याचा निर्णय होणार का, याकडे सगळ्यांचं लक्ष लागलं आहे.
