पुणे: शुक्रवारी पुण्यात कुख्यात गुंड शरद मोहोळ याची गोळ्या झाडून हत्या करण्यात आली. याप्रकरणात पोलिसांनी आठ तासात सर्व आरोपींना जेरबंद केले आहे. पोलिसांनी फिल्मी स्टाईलने सर्व आरोपींना अटक केली. दरम्यान आज पुणे पोलिसांनी पत्रकार परिषद घेत कारवाईची माहिती दिली.
पत्रकार परिषदेत रामनाथ पोकळे, अतिरिक्त पोलीस आयुक्त यांनी माहिती दिली की, शरद मोहोळ घरातून बाहेर पडल्यावर दुपारी दीड वाजण्याच्या सुमारास सोबत असलेल्या साथीदाराने त्याचा खून केला. आरोपी मुन्ना उर्फ साहिल पोळेकर राहणार सुतारदरा आणि इतर दोन साथीदारांनी गोळ्या घालत मोहोळचा खून केला. घटनेनंतर तीन आरोपी घटनास्थळावरून पळून गेले होते. मुख्य आरोपी पोळेकर हा शरद मोहोळ सोबत अनेक दिवसांपासून सोबत फिरायचा. गुन्हे शाखेकडून तपासासाठी आठ पथके तयार करण्यात आली होती. शहरातील सर्व रस्ते बंद करत नाकाबंदी करण्यात आली होती.आरोपी खेडे शिवापूर टोलनाक्याजवळ लपून बसले होते.
तीन जणांनी शरद मोहोळ वर गोळ्या झाडल्या
घटनेतील मुख्य आरोपी शरद मोहोळ सोबत अनेक दिवसांपासून सोबत फिरायचा. नामदेव महिपती कानगुडे आणि विठ्ठल किसन गांडले या दोघांचं शरद मोहोळ याच्यासोबत पूर्व वैमनस्य होते. नामदेव कानगुडे हा मुख्य आरोपी पोळेकर याचा मामा आहे. या पूर्व वैमनस्यातूनच हल्ला केल्याची प्राथमिक माहिती आरोपींकडून मिळाली आहे.
एकूण आठ आरोपी
या वकिलांचा गुन्ह्यांमध्ये नेमका रोल काय याचा तपास आम्ही सुरू करत आहोत. गेल्या २५ दिवसांपासून मुख्य आरोपी शरद मोहोळच्या संपर्कात होते. मुख्य आरोपी मुन्ना पोळेकर याने पिस्टल गोळा केले होते. चार महिन्यांपूर्वी हे पिस्टल घेऊन आले होते आणि याच पिस्टलने शरद मोहोळवर गोळ्या झाडण्यात आल्या. यातली अनेक आरोपी रेकॉर्डवरील गुन्हेगार आहेत.
