Pune News : पुणे : पंतप्रधान नरेंद्र मोदी यांच्या पुणे दौऱ्यानिमित्त शहरात कडक सुरक्षाव्यवस्था ठेवण्यात आली होती. पंतप्रधानांनंतर आता केंद्रीय गृहमंत्री अमित शाह पुणे दौऱ्यावर येत आहेत. यामुळे पुन्हा एकदा शहरात चोख सुरक्षाव्यवस्था ठेवण्यात येत आहे. याच दरम्यान पुणे विमानतळावर एक धक्कादायक घटना घडली आहे. विमानतळावरील महिलेने माझ्याकडे बॉम्ब असल्याचा दावा केला. त्यानंतर सुरक्षा यंत्रणेची भंबेरी उडाली. संबंधित महिलेला त्वरित ताब्यात घेण्यात आले असून, तिची कसून चौकशी सुरु आहे.
विमानतळावर खळबळ
शहरात राजकीय व्यक्तींच्या दौऱ्यादरम्यान कडकोट सुरक्षाव्यवस्था करण्यात येते. अमित शाह यांच्या दौऱ्यानिमित्त विमानतळ परिसरात सुरक्षा ठेवण्यात आली आहे. सुरक्षारक्षक तपासणी करत असताना दिल्लीला निघालेली प्रवासी महिला म्हणाली की, ‘माझ्याकडे बॉम्ब आहे’. तिच्या या वक्तव्यानंतर विमानतळावर खळबळ उडाली. (Pune News) पोलिसांनी महिलेची कसून तपासणी केली. तसेच संबंधित महिलेला तत्काळ ताब्यात घेतले. निती कपलानी असे महिलेचे नाव आहे. विमानतळ पोलीस ठाण्यात तिच्यावर गुन्हा दाखल झाला आहे.
दरम्यान, याबाबत सीआरपीएफ कॉन्स्टेबल दीपाली झवारे यांनी दिलेल्या तक्रारीवरुन ७२ वर्षीय निती कपलानी यांच्यावर गुन्हा दाखल करण्यात आला आहे. (Pune News) त्यांनी महिलेविरुद्ध भारतीय दंड विधान कलम ५०५ आणि १८२ नुसार गुन्हा दाखल करण्यात आला आहे.
बॉम्ब असल्याची खोटी माहिती का दिली, यासंदर्भातील सत्यता तपासण्यासाठी आणि त्यांच्या कृतीमागील हेतू समजून घेण्यासाठी तपास सुरू असल्याचे पीआय एस. आर. कपारे यांनी सांगितले.
