करमाळा : करमाळा शहरात थकीत वीज बिलामुळे विजेचे (Pune News) कनेक्शन तोडल्याचा राग येऊन वीज विभागाच्या कर्मचाऱ्याला मारहाण (Pune Crime) केल्याप्रकरणी तिघांविरुद्ध करमाळा पोलिसांत गुन्हा दाखल करण्यात आला आहे. याबाबत जावेद युनूस शेख (वय 38, रा. परदेशी प्लॉट, करमाळा) यांनी करमाळा पोलिस ठाण्यात फिर्याद दिली आहे. ते महावितरण करमाळा येथे वरिष्ठ तंत्रज्ञ म्हणून कार्यरत असून करमाळा शहरातील वीज वसुली व कनेक्शन संबंधित कामे पाहतात. त्यांच्या सोबत श्रीपती सरदार चव्हाण हे मुख्य तंत्रज्ञ म्हणून काम पाहतात. (Pune Breaking News)
फिर्यादी जावेद शेख यांच्या म्हणण्यानुसार, दिनांक 19 नोव्हेंबर 2025 रोजी कर्जत रोड, नागोबा मंदिराजवळील शौकत मुलाणी यांचे थकीत वीज बिल असल्याने त्यांचे वीज कनेक्शन तोडण्यात आले होते. त्यानंतर 20 नोव्हेंबर रोजी मुलाणी यांनी थकबाकी भरल्यामुळे सकाळी सुमारे 10.30 वाजता जावेद शेख व श्रीपती चव्हाण हे त्यांच्या घरी कनेक्शन जोडण्यासाठी गेले. विरेंद्र लष्कर यांनी डीपी बंद केल्यानंतर कनेक्शन जोडण्याचे काम पूर्ण करण्यात आले.
कनेक्शन जोडून डीपी चालू करण्यासाठी कर्मचारी जात असताना शौकत मुलाणी व त्यांची मुले कय्युम आणि आसिम यांनी वीज कर्मचाऱ्यांना अडवून तुम्ही कनेक्शन तोडण्यापूर्वी फोन का केला नाही, असे म्हणत शिवीगाळ केली. फिर्यादींनी थकित बिलामुळे कनेक्शन तोडावे लागले, असे सांगितल्यावर तिघांनी संतापून त्यांच्यावर हल्ला केला. कय्युम मुलाणी यांनी फिर्यादीला धरून ठेवले, तर आसिम व शौकत मुलाणी यांनी हाताने मारहाण केली. त्यात आसिम मुलाणी याने जवळची विट उचलून जावेद शेख यांच्या डोक्यावर व पाठीवर मारहाण केली. यात ते जखमी झाले. यावेळी श्रीपती चव्हाण यांनी हस्तक्षेप करून दोघांमध्ये मध्यस्थी केली. घटनेदरम्यान शौकत मुलाणी यांनी वीज कर्मचाऱ्यांवर खोटा गुन्हा दाखल करण्याची धमकीही दिली.
या प्रकरणी जावेद शेख यांच्या फिर्यादीवरून शौकत मुलाणी, कय्युम मुलाणी व आसिम मुलाणी या तिघांविरुद्ध शासकीय कामात अडथळा, मारहाण व धमकी दिल्याप्रकरणी विविध कलमान्वये करमाळा पोलिस ठाण्यात गुन्हा दाखल करण्यात आला आहे. पोलिस पुढील तपास करीत आहेत.
