पुणे: पुण्यातील नारायण पेठ (Pune News) परिसरात रात्रीच्या वेळी (Pune Crime) घडलेल्या एका प्रकारामुळे परिसरात काही काळ तणाव निर्माण झाला. मद्यधुंद अवस्थेत वाहन चालवणाऱ्या एका तरुणाने रस्त्यावर उभ्या असलेल्या काही वाहनांना धडक दिल्याची माहिती समोर आली आहे. अचानक झालेल्या या प्रकारामुळे स्थानिक नागरिकांमध्ये संतापाची भावना निर्माण झाली आणि काही वेळ परिसरात गोंधळाची परिस्थिती होती.
मिळालेल्या माहितीनुसार, एक तरुण आणि एक तरुणी रात्री उशिरा कारने नारायण पेठेतून जात होते. वाहन भरधाव वेगात असल्याने कार रस्त्यावर उभ्या असलेल्या काही गाड्यांना धडकली. अपघातानंतर स्थानिक नागरिकांनी संबंधित तरुणाशी चौकशी करण्याचा प्रयत्न केला असता, त्याने स्वतःला पोलिसाचा मुलगा असल्याचे सांगत आरडाओरडा सुरू केला. त्याच्या या अरेरावी वर्तनामुळे परिस्थिती अधिक बिघडली.
सुदैवाने या अपघातात कोणालाही दुखापत झाली नाही. पण काही गाड्यांचे नुकसान झाले असून वाहनमालकांनी नाराजी व्यक्त केली आहे. धडक दिल्यानंतर तरुणाचं वागणंही नागरिकांना आवडलं नाही.
हा संपूर्ण प्रकार विश्रामबाग पोलीस स्टेशनच्या हद्दीत घडला. घटनेची माहिती मिळताच पोलिसांनी तातडीने घटनास्थळी पोहोचून परिस्थिती नियंत्रणात आणली. दोन्ही पक्षांकडून तक्रार नोंदवून घेण्यात आली असून पुढील तपास सुरू आहे. मद्यधुंद अवस्थेत वाहन चालवणे आणि सार्वजनिक शांतता भंग केल्याबद्दल संबंधितांवर योग्य ती कारवाई केली जाईल, असं पोलिसांनी सांगितले आहे.
