पुणे : इसिस मॉड्यूलमधील अतिरेक्यांसंदर्भात धक्कादायक वास्तव समोर आले आहे. इसिस मॉड्यूल प्रकरणात राष्ट्रीय तपास संस्थेने (NIA) नुकतेच आरोपपत्र दाखल केले आहे. त्यात अतिरेक्यांनी बदला घेण्याचा प्लॅन तयार केला होता. त्यासाठी त्यांनी जंगलात प्रशिक्षण केंद्र उघडले होते. जंगलात बॉम्बस्फोटाची चाचणी केली होती. आयईडी बनवत होते. धक्कादायक बाब म्हणजे पुणे शहरातील अनेक भागांतील युवकांचे माइंडवॉश करुन त्यांना दहशतवादाकडे ओढत असल्याचे वास्तव उघडकीला आले आहे.(Pune ISIS module)
या अतिरेक्यांनी देशभरात अनेक ठिकाणी बॉम्बस्फोट घडण्याची योजना तयार केली होती. अतिरेक्यांनी बॉम्बची निर्मिती करण्यासाठी काही कोडवर्ड ठेवले होते. पुणे येथील इसिस मॉड्यूल प्रकरणात सात जणांवर एनआयएने यूएपीए, विस्फोटक पदार्थ अधिनियम आणि इतर कलमांनुसार चार्जशीट दाखल केले आहे. इसिस मॉड्यूलमधील दहशतवादी उच्चशिक्षित असून, त्यांना ३१ लाख रुपयांचे पॅकेज असल्याची बाब देखील एनआयएने आरोपपत्रात दिली आहे.(NIA)
मोहम्मद इमरान, मोहम्मद युसुफ खान उर्फ मटका, आमिर अब्दुल हमीद, मोहम्मद युनुस, मोहम्मद याकूब साकी उर्फ आदिल आणि सलीम खान यांनी हे प्रकार केले होते. अली बडोदावाला आणि साकिब नाचन यामध्ये आरोपी आहे. आरोपींपैकी शाहनवाज शैफुजामा हा मायनिंग इंजिनिअर होता. अतिरेक्यांनी काही कोडवर्ड तयार केले होते. त्यांनी सल्फ्यूरिक एसिडसाठी सिरका हा कोडवर्ड ठेवला होता. असेटॉन केमिकल्ससाठी रोज वॉटर तर हायड्रोजन प्यारॉक्सॉइडसाठी शरबत कोडवर्ड होता. अतिरेक्यांनी अनेक राज्यात दहशतवादी हल्ला करण्यासाठी रेकी केली होती. त्यासाठी पोलिसांना लक्षात येऊ नये म्हणून दुचाकीचा वापर ते करत होते.
दरम्यान, जुल्फिकार याला मल्टीनेशनल कंपनीत ३१ लाखांचे वार्षिक पॅकेज होते. अटक केलेले सर्वच अतिरेकी उच्चशिक्षित होते. त्यातील कादीर पठाण ग्राफिक डिजाइनर होता. आयईडी बनवण्यासाठी सहज उपलब्ध होणारे थर्मामीटर, १२ वॅटचा बल्ब, फिल्टर पेपर, आगपेटी, स्पीकर वायर आणि सोडा पावडरचा ते वापर करत होते.
