यवत, ता. २७ : कुर्डुवाडी येथे नातेवाईकांना भेटून परत येत असताना एका तरुणाचा सोलापूर-पुणे महामार्गावर भीषण अपघातात मृत्यू झाला. अज्ञात वाहनाने धडक देऊन चालकाने घटनास्थळावरून पलायन केल्याप्रकरणी यवत पोलिस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
याप्रकरणी वैशाली विश्वास काळे (वय ५०, रा. आदर्शनगर, येरवडा, पुणे) यांनी यवत पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादींचा मुलगा विशाल विश्वास काळे हा मजुरी करून कुटुंबाचा उदरनिर्वाह करत होता. १९ जून रोजी तो पत्नी ऋतुजासह कुर्डुवाडी (कवेरोपळे) येथे नातेवाईकांना भेटण्यासाठी गेला होता. २३ जून रोजी दुपारी ऋतुजाच्या बहिणीचा फोन आला. तिने विशालने ऋतुजाला टेंभुर्णी येथून बसमध्ये बसवून दिल्याचे सांगितले. मात्र, विशाल घरी परतला नसल्याची माहिती मिळाली.
काही वेळाने शंकर शेलार यांच्या माध्यमातून सोलापूर-पुणे महामार्गावरील बोरीभडक (ता. दौंड) परिसरात एका अपघातग्रस्ताचा फोटो व्हॉट्सॲपवर आल्याची माहिती मिळाली. फोटो पाहिल्यानंतर तो विशालच असल्याची शंका व्यक्त करण्यात आली. यानंतर कुटुंबीयांनी पोलिसांशी संपर्क साधला. यवत पोलिस ठाण्यात आल्यानंतर पोलिस आणि शासकीय वैद्यकीय अधिकाऱ्यांनी विशाल काळे यांचा अपघातात मृत्यू झाल्याची माहिती दिली.
त्यानंतर शवविच्छेदनासाठी मृतदेह ससून रुग्णालयात पाठविण्यात आला. शवविच्छेदनानंतर मृतदेह नातेवाईकांच्या ताब्यात देण्यात आला असून, येरवडा येथे अंत्यसंस्कार करण्यात आले. या प्रकरणी अज्ञात वाहनावरील अज्ञात चालकाने निष्काळजीपणे वाहन चालवून अपघात घडवून आणल्याप्रकरणी यवत पोलिस ठाण्यात भारतीय न्याय संहिता कलम १०६(१), २८१, १२५(अ), १२५(ब) तसेच मोटार वाहन कायदा कलम १८४, १३४ व १७७ अन्वये गुन्हा दाखल करण्यात आला आहे. पुढील तपास यवत पोलिस करीत आहेत.
