ओमकार भोरडे
शिरूर: शनिवारी भरणाऱ्या शिरूर मार्केट यार्डच्या आठवडे बाजारात चोरीच्या घटना व वाहतूक नियमांचे उल्लंघन रोखण्यासाठी शिरूर पोलिसांनी आज विशेष बंदोबस्त ठेवला. सकाळी 10:30 ते 11:30 वा. दरम्यान बाजार परिसरात पेट्रोलिंग व नाकाबंदी करण्यात आली.
बाजारात मोठी गर्दी, पोलिसांचा पहारा
दि. 27 जून रोजी सकाळी 10:30 ते 11:10 वा. दरम्यान शिरूर पोलीस स्टेशन हद्दीतील मार्केट यार्ड येथील आठवडे बाजाराला पोलिसांनी भेट दिली. दर शनिवारी भरणाऱ्या या बाजारात शिरूर शहर व पंचक्रोशीतील नागरिकांसह अहिल्यानगर जिल्ह्यातील श्रीगोंदा व पारनेर तालुक्यातील शेतकरी मोठ्या संख्येने भाजीपाला, किराणा व जीवनावश्यक वस्तूंच्या खरेदी-विक्रीसाठी येतात. त्यामुळे बाजारात मोठी गर्दी व वर्दळ असते.
मोबाईल चोरी, दागिने चोरी व इतर मालमत्तेविरुद्धचे गुन्हे घडण्याची शक्यता लक्षात घेऊन पोलीस अधिकारी व अंमलदारांनी बाजार परिसरात मोठ्या प्रमाणावर पेट्रोलिंग केले. शेतकरी व नागरिकांशी संवाद साधून त्यांच्या अडीअडचणी समजून घेतल्या. प्राप्त सूचना व समस्यांवर उपाययोजना करण्यासाठी मार्केट यार्ड, शिरूर यांच्या कार्यालयास लेखी पत्र देण्यात येणार आहे.
मार्केट यार्ड येथे नाकाबंदी
याच अनुषंगाने सकाळी 11:00 ते 11:30 वा. दरम्यान छत्रपती शिवाजी महाराज मार्केट यार्ड, शिरूर येथे नाकाबंदी करण्यात आली. नाकाबंदी दरम्यान :
- ब्लॅक फिल्म लावलेल्या गाड्या
- नंबर प्लेट नसलेली वाहने
- ड्रायव्हिंग लायसन्स नसलेले चालक
- इतर वाहतूक नियम मोडणारे वाहनचालक
अशा वाहनचालकांवर मोटार वाहन कायद्यान्वये कायदेशीर कारवाई करण्यात आली.
कायदा व सुव्यवस्था अबाधित राखणे, गुन्हे प्रतिबंध करणे तसेच नागरिकांमध्ये सुरक्षिततेची भावना निर्माण करणे या उद्देशाने ही कार्यवाही करण्यात आल्याचे पोलिसांनी सांगितले.
बाजारात येताना नागरिकांनी आपले मौल्यवान सामान जपून ठेवावे व संशयास्पद व्यक्ती आढळल्यास तात्काळ पोलिसांना कळवावे, असे आवाहन शिरूर पोलिसांनी केले आहे.
