दौंड, ता. २७ : दौंड पोलिसांनी मध्यरात्रीच्या नाकाबंदीदरम्यान मोठी कारवाई करत विनापरवाना घरगुती व व्यावसायिक वापराचे ५६ भरलेले गॅस सिलेंडर वाहतूक करणाऱ्या सुपर कॅरी वाहनासह सुमारे ५ लाख ४ हजार ४०० रुपयांचा मुद्देमाल जप्त केला. या प्रकरणी वाहनचालकाविरुद्ध अत्यावश्यक वस्तू अधिनियमांतर्गत गुन्हा दाखल करण्यात आला आहे.
याप्रकरणी पोलीस कॉन्स्टेबल अर्जुन पांडुरंग नरळे (बकल नं. २८८७, दौंड पोलीस ठाणे) यांनी फिर्याद दिली आहे. तर चंद्रशेखर शंकरराव चव्हाण (वय ३५, रा. मुंढेकरवाडी, ता. श्रीगोंदा, जि. अहिल्यानगर) याच्याविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, २५ जून रोजी रात्री ११ ते २६ जून रोजी पहाटे ५ वाजेपर्यंत नगरमोरी चौक येथे नाकाबंदी सुरू होती. रात्री सुमारे १२.०५ वाजता अहिल्यानगरकडून दौंडकडे येणारी मारुती सुझुकी सुपर कॅरी (एमएच-१२ एक्सएम-६३१४) पोलिसांनी संशयावरून थांबवली.
वाहनाची तपासणी केली असता त्यामध्ये घरगुती व व्यावसायिक वापराचे एकूण ५६ भरलेले गॅस सिलेंडर आढळून आले. चालकाकडे गॅस सिलेंडर वाहतूक व वितरणाचा कोणताही वैध परवाना नव्हता. तसेच सिलेंडर कुठून आणले आणि कोणत्या वितरकाकडून घेतले, याबाबतही तो समाधानकारक माहिती देऊ शकला नाही.
यानंतर वाहन दौंड पोलीस ठाण्यात आणून पुरवठा निरीक्षकांकडून पंचनामा करण्यात आला. तपासात विनापरवाना गॅस सिलेंडरची साठवणूक व विक्रीसाठी वाहतूक केल्याचे निष्पन्न झाले. कारवाईदरम्यान एचपी कंपनीचे ५ किलोचे ६ सिलेंडर, भारत गॅसचे १९ किलोचे २ सिलेंडर, भारत गॅसचे १४ किलोचे ६ सिलेंडर, कॅप्सॉन कंपनीचे ४ किलोचे ४२ सिलेंडर तसेच सुपर कॅरी वाहन असा एकूण ५ लाख ४ हजार ४०० रुपयांचा मुद्देमाल जप्त करण्यात आला.
या प्रकरणी चंद्रशेखर शंकरराव चव्हाण याच्याविरुद्ध अत्यावश्यक वस्तू अधिनियम, १९५५ मधील कलम ३ व ७ तसेच Liquefied Petroleum Gas (Regulation of Supply and Distribution) Order, 2000 मधील कलम ३ अन्वये दौंड पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक रुपेश कदम करीत आहेत.
