पिंपरी-चिंचवड: पिंपरी-चिंचवडमधील देहूगाव परिसरात पैशांच्या व्यवहारावरून सुरू झालेला कौटुंबिक वाद थेट खुनापर्यंत पोहोचल्याची धक्कादायक घटना उघडकीस आली आहे. माळीनगर येथे राहणाऱ्या दोन सख्ख्या भावांमध्ये झालेल्या जोरदार भांडणादरम्यान धाकट्या भावाने मोठ्या भावावर धारदार चाकूने वार केल्याने त्याचा मृत्यू झाला. या प्रकरणात पोलिसांनी 20 वर्षीय संशयिताला अटक केली असून पुढील तपास सुरू आहे.
पोलिसांनी दिलेल्या माहितीनुसार, 24 वर्षीय विनायक राजेंद्र कुदळे आणि त्याचा धाकटा भाऊ घनशाम हे दोघे एकाच खोलीत राहत होते. मंगळवारी पहाटे उसणे दिलेल्या पैशांच्या परतफेडीच्या मुद्द्यावरून दोघांमध्ये वाद सुरू झाला. सुरुवातीला शाब्दिक बाचाबाची झाल्यानंतर हा वाद हाणामारीपर्यंत पोहोचला.
रागाच्या भरात घनशामने घरात असलेला भाजी कापण्याचा धारदार चाकू हातात घेतला आणि विनायकच्या छातीत वार केल्याचा आरोप आहे. गंभीर जखमी झालेला विनायक रक्ताच्या थारोळ्यात कोसळला. घटनेनंतर परिसरातील नागरिकांनी तातडीने त्याला रुग्णालयात दाखल केले, मात्र वैद्यकीय अधिकाऱ्यांनी तपासणीनंतर त्याला मृत घोषित केले.
या घटनेची माहिती मिळताच देहूगाव पोलीस घटनास्थळी दाखल झाले. पंचनामा आणि प्राथमिक तपासानंतर संशयित घनशामला ताब्यात घेऊन त्याच्याविरुद्ध खुनाचा गुन्हा दाखल करण्यात आला असून अधिक तपास सुरु आहे.
