सोलापूर: सोलापूर जिल्ह्यातील मोहोळ तालुक्यात एका 27 वर्षीय तरुणाची चाकूने भोसकून हत्या करण्यात आल्याची अत्यंत धक्कादायक घटना समोर आली आहे. अनैतिक संबंधाच्या संशयातून हा खून झाल्याचे प्राथमिक तपासात निष्पन्न झाले असून, या घटनेमुळे संपूर्ण परिसरात मोठी खळबळ उडाली आहे.
मृत तरुणाचे नाव युवराज अशोक व्यवहारे असे आहे. मिळालेल्या माहितीनुसार, युवराज काही वर्षांपूर्वी एका जिल्हा परिषद शाळेच्या बसवर चालक म्हणून काम करत होता. याच कालावधीत त्याची एका महिलेशी ओळख झाली होती. या ओळखीचे रूपांतर अनैतिक संबंधात झाले असावे, असा संशय संबंधित महिलेच्या नातेवाईकांना होता. या कारणावरून पूर्वीही त्यांच्यात वाद झाले होते, जे त्यावेळी मिटवण्यात आले होते.
सोमवारी मध्यरात्री १२ च्या सुमारास युवराज आपल्या घराच्या अंगणात गाढ झोपलेला असताना काही आरोपी तिथे पोहोचले. “तू आमच्या घरातील महिलांच्या आणि मुलींच्या मागे लागतोस,” असा आरोप करत आरोपींनी त्याला शिवीगाळ केली आणि त्याच्यावर चाकूने सपासप वार केले. या भीषण हल्ल्यात युवराजचा जागीच मृत्यू झाला.
या प्रकरणी मृत युवराजचे वडील अशोक निवृत्ती व्यवहारे यांनी मोहोळ पोलीस ठाण्यात तक्रार दाखल केली असता १२ तासांच्या आत दत्ता अण्णा पवार, प्रशांत बाळू शिंदे, अण्णा हरिदास पवार आणि अंबिका अण्णा पवार या चारही संशयित आरोपींना अटक केली आहे. दरम्यान, या प्रकरणी पोलिस अधिक तपास करत आहेत.
