यवत, (पुणे) : भुलेश्वर (ता. पुरंदर) येथे रात्रीच्या वेळी देवदर्शनासाठी सोबत चाललेल्या तरुणीने रस्त्यात गाडी थांबवून तीन अनोळखी साथीदारांच्या मदतीने 28 वर्षीय तरुणाला मारहाण केल्याची घटना उघडकीस आली आहे. याप्रकरणी एका तरुणीसह चौघांवर यवत पोलीस ठाण्यात गुन्हा दाखल करण्यात आला आहे. हि घटना बुधवारी (ता. 17) रात्री नऊ वाजण्याच्या सुमारास यादववाडी जवळ, भुलेश्वर घाटाच्या परिसरात घडली.
काजल जाधव (पूर्ण नाव व पत्ता माहिती नाही रा. यवत, ता. दौंड) या तरुणीसह तीन अनोळखी इसमांविरुद्ध गुन्हा दाखल करण्यात आला. याप्रकरणी श्रीनाथ संपत माने (वय २८ वर्षे, व्यवसाय- खाजगी नोकरी, रा. पिंपळवाडी, साखरवाडी, ता. फलटण, जि. सातारा) यांनी यवत पोलीस ठाण्यात फिर्याद दिली.
पोलिसांनी दिलेल्या माहितीनुसार, श्रीनाथ माने आणि आरोपी काजल जाधव हे बुधवारी (ता. 17) रात्री नऊ वाजण्याच्या सुमारास दोघे भुलेश्वर येथे देवदर्शनासाठी चालले होते. यादववाडी जवळ, भुलेश्वर घाटाच्या अलीकडे त्यांनी आपली गाडी साईडला घेतली आणि ते गप्पा मारत थांबले. त्याच वेळी अचानक अंधारातून तीन अनोळखी इसम तिथे आले. या इसमांनी काजल जाधव हिची विचारपूस करण्यास सुरुवात केली.
यावेळी अचानक अनोळखी इसमांनी श्रीनाथला सुरुवातीला हाताने आणि लाथाबुक्क्यांनी बेदम मारहाण केली. त्यानंतर एकाने लाकडी काठीने तर दुसऱ्याने आपल्या कमरेचा चामडी पट्टा काढून श्रीनाथच्या तोंडावर, हातावर, पायावर आणि पाठीवर मारहाण केली असल्याचे फिर्यादीत म्हटले आहे.
सर्वांत धक्कादायक बाब म्हणजे, ज्या तरुणीसोबत श्रीनाथ आला होता, तिने त्याला या गुंडांच्या तावडीतून वाचवण्याऐवजी, उलट श्रीनाथलाच शिवीगाळ व दमदाटी करण्यास सुरुवात केली. रस्त्यावर सुरू असलेला हा मारहाणीचा थरार पाहून आजूबाजूचे नागरिक तिथे जमा झाले. जमावाने मध्यस्थी करत संघर्ष करून श्रीनाथला या तीन गुंडांच्या तावडीतून सोडवले.
दरम्यान, याप्रकरणी चौघांवर यवत पोलीस ठाण्यात गुन्हा दाखल करण्यात आला असून या मारहाणीमागे नेमके काय कारण आहे? हा पूर्वनियोजित कट होता की एखाद्या हनी ट्रॅपचा भाग? याचा तपास आता पोलीस करत आहेत. या प्रकरणाचा पुढील तपास यवत पोलीस ठाण्याचे पोलीस हवालदार सोनवणे हे करत आहेत.
