पुणे: पुण्यातील पाटील इस्टेट परिसरात किरकोळ वादातून निर्माण झालेल्या तणावपूर्ण घटनेमुळे परिसरात काही काळ भीतीचे वातावरण पसरले होते. रस्त्यावर गाडी बाजूला घेण्याच्या कारणावरून झालेल्या वादानंतर एका व्यक्तीने हातात धारदार शस्त्र घेऊन नागरिकांना धमकावल्याचा प्रकार समोर आला आहे.
ही घटना पाटील इस्टेटमधील गल्ली क्रमांक 10 येथे घडली. स्थानिकांच्या माहितीनुसार, रस्त्यावर वाहन उभे करण्याच्या कारणावरून दोन पक्षांमध्ये सुरुवातीला शाब्दिक वाद झाला. मात्र काही वेळातच हा वाद चिघळला आणि त्याचे रूपांतर गोंधळात झाले.
आरोपी म्हणून ओळखल्या जाणाऱ्या जुनी राजसिंग युवराज सिंग याने संतापाच्या भरात हातात शस्त्र घेतल्याचे सांगितले जात आहे. त्याने समोरच्या व्यक्तीला धमकावण्याचा आणि हल्ला करण्याचा प्रयत्न केल्याचा आरोप करण्यात आला आहे. या वेळी परिसरातील काही महिलांनी धाडस दाखवत हस्तक्षेप केला. त्यांनी परिस्थिती नियंत्रणात आणण्याचा प्रयत्न करत आरोपीच्या हातातील शस्त्र काढून घेतल्याची माहिती मिळाली आहे.
View this post on Instagram
घटनेनंतर आरोपीने परिसरातील नागरिकांनाही धमकावल्याचा आरोप आहे. त्यामुळे रस्त्यावर काही काळ गोंधळाचे वातावरण निर्माण झाले. नागरिकांमध्ये भीतीचे वातावरण पसरले असून अनेकांनी या प्रकाराबाबत नाराजी व्यक्त केली आहे.
घटनेची माहिती मिळताच पोलिसांनी घटनास्थळी धाव घेतली. स्थानिक नागरिक आणि संबंधित व्यक्तीच्या तक्रारीनंतर खडकी पोलीस ठाण्यात गुन्हा दाखल करण्यात आला आहे. पोलिसांनी प्रकरणाची नोंद करून तपास सुरू केला असून आरोपीविरोधात कायदेशीर कारवाईची प्रक्रिया सुरू आहे.
या घटनेमुळे परिसरातील कायदा आणि सुव्यवस्थेचा प्रश्न पुन्हा ऐरणीवर आला असून नागरिकांनी अशा प्रकारांवर कठोर कारवाईची मागणी केली आहे.
