यवत, (पुणे) : “माझ्याकडे रागाने का बघतोस?” असे म्हटल्याने एका 26 वर्षीय तरुणाला काठीने मारहाण करण्यात आली. यवत पोलीस ठाण्याच्या हद्दीतील खुटबाव (ता. दौंड) हद्दीतील साळोबावस्ती परिसरात ही बुधवारी (ता. 24) सायंकाळी पाच वाजण्याच्या सुमारास घडली.
अमोल बाळासाहेब साळवे (वय 26, रा. खुटबाव साळोबावस्ती, ता. दौंड, जि. पुणे) असे मारहाण झालेल्या तरुणाचे नाव आहे. तर विजय राजू भांडवलकर (रा. सदर) असे मारहाण केलेल्या तरुणाचे नाव आहे. साळवे यांनी दिलेल्या जबाबावरून यवत पोलिसांनी आरोपीविरुद्ध गुन्हा दाखल केला आहे.
पोलिसांनी दिलेल्या माहितीनुसार, फिर्यादी अमोल साळवे हे कुटुंबीयासोबत खुटबाव येथे राहतात. त्यांच्या घरापासून काही अंतरावर त्यांचा ओळखीचा विजय राजू भांडवलकर हा राहतो. बुधवारी (ता. 24) सायंकाळी पाच वाजण्याच्या सुमारास अमोल हे साळोबावस्ती येथील गणपती मंदिराजवळ उभे होते.
त्याच वेळी त्यांची भाचीने “मामा” अशी हाक मारून त्यांना जवळ बोलावले. अमोल भाचीकडे जात असताना, तेथील एका दुकानासमोर उभा असलेला विजय राजू भांडवलकर हा अमोल यांच्याकडे रागाने बघत होता. अमोल यांनी त्याला सहज विचारले, “तू माझ्याकडे रागाने का बघतोस?”
“रागाने का बघतोस” असे विचारताच आरोपी विजय याने अमोल यांना अश्लील शिवीगाळ करत दमदाटी सुरू केली. यावेळी त्या ठिकाणी पडलेली एक लाकडी काठी हातात घेतली आणि अमोल यांच्यावर हल्ला चढवला. त्याने या काठीने अमोल यांच्या दोन्ही हातांवर, पाठीवर आणि छातीवर बेदम प्रहार केले. या गंभीर मारहाणीमुळे अमोल साळवे जखमी होऊन जागीच खाली कोसळले.
अमोल यांचा आरडाओरडा ऐकून त्यांचे मामाचा मुलगा सचिन इंगळे आणि अविनाश नुथर कोलते यांनी तात्काळ घटनास्थळाकडे धाव घेतली. त्यांनी अमोल यांना गंभीर अवस्थेत मोटारसायकलवर बसवून उपचारासाठी तात्काळ यवत ग्रामीण रुग्णालयात दाखल केले. घटनेची माहिती मिळताच यवत पोलिसांनी ग्रामीण रुग्णालय गाठले.
दरम्यान, अमोल साळवे पूर्ण शुद्धीवर असताना त्यांची पत्नी काजल साळवे आणि बहीण भारती मिरपगार यांच्या समक्ष पोलिसांनी त्यांचा जबाब नोंदवून घेतला. साळवे यांनी दिलेल्या तक्रारीनुसार विविध कलमान्वये विजय भांडवलकर याच्यावर गुन्हा दाखल करण्यात आला आहे. तपास पोलीस उपनिरीक्षक भोसले करीत आहेत.
