सासवड, ता. 16 : “तू आमचे वाटोळे केले आहेस,” असे म्हणत एका महिलेला डोक्यात काठीने मारून करून जखमी केल्याचा प्रकार उघडकीस आला आहे. याप्रकरणी एका महिलेसह दोघांवर सासवड पोलीस ठाण्यात गुन्हा दाखल करण्यत आला आहे. वीर (ता. पुरंदर) हद्दीतील इंदिरानगर परिसरात मंगळवारी (ता. 14) रात्री 8 ते बुधवारी (ता. 15) सकाळी साडेसात वाजण्याच्या सुमारास हा प्रकार घडला.
लिला दिनेश सावंत (वय 45, धंदा मजुरी, रा. इंदिरानगर वीर ता. पुरंदर) असे मारहाण झालेल्या महिकेचे नाव आहे. त्यांनी दिलेल्या फिर्यादीवरून ताराबाई जालिंदर माळवे, व जालिंदर रघुनाथ माळवे, (दोघेही रा. इंदिरानगर, वीर, ता. पुरंदर) यांच्यावर उरुळी कांचन पोल्सी ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी लीला सावंत या मंगळवारी रात्री आठ वाजण्याच्या सुमारास आपल्या घरी चुलीजवळ बसल्या होत्या. यावेळी त्यांच्या शेजारी राहणारी ताराबाई माळवे या फिर्यादीच्या घरासमोर आल्या. “तू आमचे वाटोळे केले आहेस,” असे म्हणत अश्लील शिवीगाळ आणि दमदाटी करण्यास सुरुवात केली.
वाद वाढत गेल्यानंतर आरोपी ताराबाई हिने आपल्या हातातील लाकडी काठीने लीला यांच्या डोक्यात उजव्या बाजूला जोराने प्रहार केला. यामध्ये लीला सावंत या जखमी झाल्या. यावेळी लीला यांची बहीण सुनीता महेश शिंदे ही भांडण सोडवण्यासाठी मध्यस्थी करायला आली असता, आरोपींनी तिलाही हाताने मारहाण करून शिवीगाळ व दमदाटी केली.
दरम्यान, याप्रकरणी सासवड पोलिसांनी सावंत यांनी दिलेल्या तक्रारीनुसार ताराबाई माळवे, व जालिंदर माळवे यांच्याविरुद्ध गुन्हा दाखल केला आहे. तपास पोलीस हवालदार जाधव करीत आहेत.
