पुणे: पुणे शहरात यंदाच्या जुलै महिन्यात पावसाने जोरदार हजेरी लावत अनेक वर्षांचे विक्रम मोडण्याची शक्यता निर्माण केली आहे. हवामान विभागाने पुणे शहर आणि परिसरासाठी पुढील 2 ते 3 दिवसांचा हवामान अंदाज जाहीर केला असून, नागरिकांना सतर्क राहण्याचे आवाहन करण्यात आले आहे.
पुणे शहरात सध्या आकाश ढगाळ राहण्याची शक्यता असून, शहर आणि उपनगरांमध्ये हलक्या ते मध्यम स्वरूपाच्या पावसाच्या सरी कोसळण्याचा अंदाज आहे. मात्र लोणावळा, मावळ, मुळशी तसेच घाट परिसरात पावसाचा जोर अधिक राहण्याची शक्यता आहे. या भागांसाठी हवामान विभागाने ऑरेंज अलर्ट जारी केला आहे. त्यामुळे विकेंडला पर्यटनासाठी बाहेर पडणाऱ्यांनी विशेष खबरदारी घेण्याचे आवाहन प्रशासनाने केले आहे.
यंदाच्या जून महिन्यात पावसाने फारशी साथ दिली नव्हती. मात्र 1 जुलैपासून पावसाने जोरदार पुनरागमन केले आणि संपूर्ण चित्र बदलले. 1 जुलै ते 28 जुलै या कालावधीत पुणे शहरात तब्बल 508.1 मिलिमीटर पावसाची नोंद झाली आहे.
विशेष म्हणजे जुलै महिन्याच्या सुरुवातीच्या 10 दिवसांतच महिन्याची सरासरी पावसाची मर्यादा पार झाली होती. यापूर्वी 1907 मध्ये जुलै महिन्यात 508.5 मिलिमीटर पावसाची नोंद झाली होती. हा विक्रम तब्बल 119 वर्षांपासून कायम आहे. आता हा विक्रम मोडण्यासाठी केवळ काही मिलिमीटर पावसाची गरज असून, यंदा पुणे नवीन इतिहास रचण्याची शक्यता आहे.
दरम्यान, पुणे शहरासह आसपासच्या धरणांच्या पाणलोट क्षेत्रातही पावसाचा चांगला परिणाम दिसून येत आहे. सततच्या पावसामुळे जलसाठ्यात वाढ होत असून, आगामी काही दिवसांतील पावसावर सर्वांचे लक्ष लागले आहे.
