पुणे: पुणे जिल्ह्यातील शिक्रापूर परिसरातून एक धक्कादायक आणि संतापजनक घटना समोर आली आहे. एकाच खोलीत राहणाऱ्या मित्रानेच आपल्या साथीदाराचा गळा दाबून खून केल्याचे पोलिस तपासात उघड झाले आहे. एवढेच नाही तर हत्येचा पुरावा नष्ट करण्यासाठी आरोपीने आपल्या 19 वर्षीय पत्नीची मदत घेत मृतदेह पोत्यात भरून निर्जन ठिकाणी फेकून दिला.
या प्रकरणाचा खुलासा 26 जुलै रोजी झाला. शिक्रापूरमधील करंजेनगर परिसरातील एका मोकळ्या जागेत झुडपांमध्ये पोत्यात बांधलेला मृतदेह आढळून आला होता. घटनेची माहिती मिळताच शिक्रापूर पोलिसांनी तपास सुरू केला. मृत व्यक्तीची ओळख पटवणे हे पोलिसांसमोर मोठे आव्हान होते. मात्र तांत्रिक माहिती आणि गुप्त सूत्रांच्या मदतीने पोलिसांनी तपास वेगाने पुढे नेला.
तपासात मृतदेह गौरव ऊर्फ अक्षय अशोक वायकर (वय 24, मूळ रा. थेऊर, ता. हवेली) याचा असल्याचे समोर आले. त्यानंतर पोलिसांनी त्याच्यासोबत राहणाऱ्या व्यक्तींची चौकशी सुरू केली.
पोलिसांच्या चौकशीत धक्कादायक माहिती समोर आली. गौरव हा करंजेनगर येथील एका खोलीत मुकेश विठ्ठल सोनवणे आणि त्याची पत्नी जान्हवी अनिल पाटोळे (वय 19) यांच्यासोबत राहत होता. मागील काही दिवसांपासून गौरव आणि मुकेश यांच्यात एका संशयावरून वारंवार वाद होत असल्याचे समोर आले.
याच वादातून मुकेशने 24 ते 26 जुलैदरम्यान गौरवचा गळा दाबून खून केल्याचा पोलिसांचा संशय आहे. त्यानंतर मृतदेह लपवण्यासाठी मुकेशने पत्नी जान्हवीची मदत घेतली. दोघांनी मिळून मृतदेह पोत्यात भरला आणि तो निर्जन ठिकाणी नेऊन टाकला.
या प्रकरणी मृत गौरवची आई कांचन अशोक वायकर यांनी शिक्रापूर पोलीस ठाण्यात तक्रार दाखल केली आहे. त्यानुसार पोलिसांनी मुकेश आणि जान्हवी या दोघांना अटक केली असून पुढील तपास सुरू आहे. मित्रानेच मित्राचा जीव घेतल्याने शिक्रापूर परिसरात मोठी खळबळ उडाली असून नागरिकांमध्ये संतापाचे वातावरण आहे.
