पुणे: पुणे जिल्ह्यात ऑनलाइन शेअर ट्रेडिंगच्या नावाखाली तब्बल ५६.२५ लाख रुपयांची फसवणूक झाल्याची धक्कादायक घटना समोर आली आहे. सोशल मीडियावरील एका आकर्षक जाहिरातीला भुललेल्या मुळशी तालुक्यातील एका पोलीस पाटलाला चांगल्या परताव्याचे आमिष दाखवत सायबर भामट्यांनी मोठा गंडा घातला. या प्रकरणी पौड पोलीस ठाण्यात गुन्हा दाखल करण्यात आला असून पोलिसांनी “सिया” नाव सांगणाऱ्या महिलेसह इतर अज्ञात आरोपींचा शोध सुरू केला आहे.
पोलिसांनी दिलेल्या माहितीनुसार, नोव्हेंबर २०२५ ते जानेवारी २०२६ या कालावधीत ही फसवणूक झाली. तक्रारदाराला सोशल मीडियावर एका नामांकित ब्रोकरेज कंपनीसारखी दिसणारी जाहिरात दिसली. जाहिरातीवर क्लिक करताच त्यांना व्हॉट्सअॅपवरील गुंतवणुकीशी संबंधित एका ग्रुपमध्ये जोडण्यात आले.
यानंतर “सिया” नाव सांगणाऱ्या एका महिलेने त्यांच्याशी संपर्क साधला. तिने ऑनलाइन शेअर ट्रेडिंगमधून मोठा नफा मिळवून देण्याचे आश्वासन देत त्यांच्या मोबाईलमध्ये एक ट्रेडिंग अॅप इन्स्टॉल करण्यास सांगितले. विश्वास बसावा म्हणून सुरुवातीला अॅपमध्ये बनावट नफा दाखवण्यात आला. तसेच सवलतीच्या दरात आयपीओ शेअर्स मिळतील, असे आमिषही दाखवण्यात आले.
या आमिषाला बळी पडून तक्रारदाराने टप्प्याटप्प्याने एकूण ५६ लाख २५ हजार रुपयांची गुंतवणूक केली. अॅपवरील डॅशबोर्डमध्ये त्यांच्या गुंतवणुकीचे मूल्य सातत्याने वाढत असल्याचे दिसत होते. काही दिवसांनी त्यांच्या पोर्टफोलिओची किंमत तब्बल १० कोटी रुपये झाल्याचेही अॅपमध्ये दाखवण्यात आले.
मोठी रक्कम दिसल्यानंतर तक्रारदाराने पैसे काढण्याचा प्रयत्न केला. मात्र, त्यांना पैसे मिळाले नाहीत. उलट, रक्कम खात्यात जमा करण्यासाठी आणखी ३० लाख रुपये ‘सिक्युरिटी डिपॉझिट’ म्हणून भरण्याची मागणी आरोपींनी केली. अधिक पैसे भरण्यास नकार दिल्यानंतर आरोपींनी तक्रारदाराशी सर्व संपर्क तोडला आणि आधी गुंतवलेली रक्कमही परत केली नाही.
आपली फसवणूक झाल्याचे लक्षात आल्यानंतर पोलीस पाटलांनी पौड पोलीस ठाण्यात तक्रार दाखल केली. पोलिसांनी सायबर फसवणुकीचा गुन्हा नोंदवून आरोपींचा शोध सुरू केला असून, या प्रकरणामागील संपूर्ण रॅकेटचा तपास सुरू आहे. पोलिसांनी नागरिकांना सोशल मीडियावरील गुंतवणुकीच्या जाहिरातींवर आंधळा विश्वास ठेवू नये आणि कोणतीही गुंतवणूक करण्यापूर्वी संबंधित संस्थेची पडताळणी करण्याचे आवाहन केले आहे.
