पुणे: पुणे शहराच्या नामांतराचा मुद्दा पुन्हा एकदा चर्चेत आला आहे. पुण्याचे नाव बदलून ‘फुलेनगर’ ठेवण्यात यावे, अशी मागणी राष्ट्रीय ओबीसी मुक्ती मोर्चाने केली आहे. यासंदर्भात संघटनेच्या पदाधिकाऱ्यांनी मुख्यमंत्री देवेंद्र फडणवीस यांची नागपूर येथे भेट घेऊन त्यांना निवेदन दिले. महात्मा जोतिबा फुले यांच्या कार्याचा सन्मान करण्यासाठी शहराचे नामांतर करावे, अशी भूमिका या निवेदनातून मांडण्यात आली आहे.
महात्मा फुले यांच्या द्विशताब्दी वर्षानिमित्त 2027 मध्ये विविध कार्यक्रम आयोजित करण्याची मागणीही संघटनेने केली आहे. फुले यांनी शिक्षण आणि सामाजिक सुधारणांसाठी केलेल्या योगदानाची दखल घेऊन त्यांना भारतरत्न पुरस्कार देण्यात यावा, असेही निवेदनात म्हटले आहे.
याशिवाय, महात्मा फुले यांच्या विचारांवर चर्चा करण्यासाठी विधिमंडळाचे एक दिवसाचे विशेष अधिवेशन आयोजित करावे, अशी मागणी करण्यात आली आहे. राज्यातील सर्व विद्यापीठांमध्ये त्यांच्या नावाने अध्यासन सुरू करावे, तसेच सामाजिक आणि प्रबोधन क्षेत्रात काम करणाऱ्या संस्था व व्यक्तींना ‘सत्यशोधक भूषण पुरस्कार’ देण्याची व्यवस्था करावी, असेही संघटनेने सुचवले आहे.
दरम्यान, पुण्याच्या नामांतराबाबत यापूर्वीही वेगवेगळ्या संघटनांकडून विविध पर्याय पुढे आले आहेत. काही संघटनांनी पुण्याचे नाव ‘जिजापूर’ किंवा ‘जिजाऊ नगर’ करण्याची मागणी केली होती. तर सुजात आंबेडकर यांनी पुण्याचे नाव ‘छत्रपती संभाजीनगर’ ठेवण्याची मागणी केल्याचेही समोर आले होते. त्यामुळे या विषयावर वेगवेगळे मतप्रवाह दिसून आले आहेत.
आता ‘फुलेनगर’ नामांतराच्या मागणीमुळे हा विषय पुन्हा चर्चेत येण्याची शक्यता आहे. मात्र, याबाबत राज्य सरकार कोणती भूमिका घेते आणि पुढे काय निर्णय होतो, याकडे नागरिकांचे लक्ष लागले आहे.
