मुंबई : मुंबईतील मढ आयलंड परिसरात पार्टीदरम्यान एका महाविद्यालयीन तरुणीवर लैंगिक अत्याचार झाल्याचा गंभीर प्रकार उघडकीस आला आहे. तरुणीच्या पेयामध्ये गुंगीचे औषध मिसळून तिच्यावर अत्याचार केल्याचा आरोप आहे. या प्रकरणी पोलिसांनी 22 वर्षीय महाविद्यालयीन विद्यार्थ्याला छत्तीसगडमधून अटक केली आहे. न्यायालयाने त्याला पोलीस कोठडी सुनावली आहे.
पोलिसांनी दिलेल्या माहितीनुसार, ही घटना 29 ऑक्टोबर रोजी घडली. मढ आयलंड येथे काही महाविद्यालयीन विद्यार्थ्यांनी पार्टीचे आयोजन केले होते. या कार्यक्रमात पीडित तरुणी आणि संशयित आरोपीही उपस्थित होते. याचदरम्यान आरोपीने तरुणीच्या शीतपेयामध्ये गुंगी आणणारा पदार्थ मिसळल्याचा आरोप आहे. ते पेय प्यायल्यानंतर तरुणीची प्रकृती बिघडली आणि ती बेशुद्ध झाली. या अवस्थेचा गैरफायदा घेत तिच्यावर लैंगिक अत्याचार करण्यात आल्याची तक्रार आहे.
घटनेनंतर तरुणीने नोव्हेंबर महिन्याच्या पहिल्या आठवड्यात आपल्या पालकांना घडलेला प्रकार सांगितला. त्यानंतर कुटुंबीयांनी पोलिसांकडे धाव घेत तक्रार नोंदवली. सुरुवातीला मालवणी पोलीस ठाण्यात शून्य एफआयआर दाखल करण्यात आली. पुढे कुटुंबीयांच्या विनंतीनुसार या प्रकरणाचा तपास जुहू पोलिसांकडे सोपवण्यात आला.
तपासादरम्यान मुख्य आरोपी मुंबईतून निघून छत्तीसगडमधील आपल्या मूळ गावी गेल्याची माहिती पोलिसांना मिळाली. त्यानुसार पोलिसांचे पथक तेथे पोहोचले आणि त्याला अटक केली. त्यानंतर न्यायालयात हजर केले असता त्याला शुक्रवारपर्यंत पोलीस कोठडी देण्यात आली.
दरम्यान, एफआयआरमध्ये आणखी एका संशयिताचे नाव आहे. मात्र, या घटनेतील त्याचा सहभाग अद्याप स्पष्ट झालेला नाही. पोलिसांकडून संबंधित व्यक्तींची चौकशी सुरू असून पुढील तपास केला जात आहे.
