डॉ. अशोक बालगुडे
पुणे: दिवाळीतील फटाक्यांच्या आतषबाजीचा परिणाम पुणे आणि पिंपरी-चिंचवडच्या हवेवर गंभीर स्वरूपात दिसून आला आहे. पुण्याचा हवा गुणवत्ता निर्देशांक (AQI) ४३२ पर्यंत पोहोचल्याने शहराची हवा ‘अतिगंभीर’ श्रेणीत नोंदविण्यात आली. काही निरीक्षण केंद्रांवर पीएम २.५ चे प्रमाण प्रतिघनमीटर सुमारे एक हजार मायक्रोग्रॅमपर्यंत पोहोचले होते.
पिंपरी-चिंचवडमध्येही प्रदूषणाची स्थिती चिंताजनक बनली. भोसरी परिसरात ३२६, तर सावता माळीनगर येथे ३२० AQI नोंदविण्यात आला. पुण्यात धनकवडी, हडपसर आणि म्हाडा कॉलनी परिसरातही प्रदूषणाचे प्रमाण वाढले.
दिवाळीतील फटाक्यांमधून निर्माण होणारे सूक्ष्म धूलिकण आणि प्रतिकूल हवामानामुळे प्रदूषक वातावरणात साचल्याचे तज्ज्ञांनी स्पष्ट केले आहे. लहान मुले, ज्येष्ठ नागरिक आणि श्वसनविकार असलेल्या व्यक्तींना याचा अधिक त्रास होण्याची शक्यता आहे.
दिवाळीचा उत्साह संपल्यानंतर नागरिकांना प्रदूषित हवेत श्वास घ्यावा लागत असल्याने प्रदूषण नियंत्रणासाठी महापालिका प्रशासनाच्या उपाययोजनांवर प्रश्न उपस्थित होत आहेत.
