अमरावती: अमरावती शहरात चर्चेचा विषय ठरलेल्या नवजात अर्भक विक्री प्रकरणात पोलिसांना मोठे यश मिळाले आहे. तब्बल 24 दिवस फरार असलेल्या डॉ. वैशाली भोजने आणि त्यांचे पती प्रफुल्ल भोजने यांना अखेर अटक करण्यात आली आहे. अमरावती पोलिसांनी साईनगर अकोली परिसरात सापळा रचून या दोघांना ताब्यात घेतले. त्यांच्या अटकेमुळे या प्रकरणातील अनेक महत्त्वाच्या बाबी समोर येण्याची शक्यता आहे.
या प्रकरणाची सुरुवात 15 ऑक्टोबर रोजी झाली होती. मिळालेल्या माहितीनुसार, डॉ. वैशाली भोजने यांच्या रुग्णालयात एका अल्पवयीन मुलीची प्रसूती झाली होती. त्यानंतर जन्मलेल्या नवजात बाळाची परस्पर दुसऱ्या व्यक्तीला विक्री करण्यात आल्याचा आरोप डॉक्टर आणि त्यांच्या पतीवर आहे. या व्यवहारासाठी 3 लाख 50 हजार रुपये ठरल्याचा दावाही करण्यात आला आहे.
शिवसेना (शिंदे गट) नेत्या वर्षा भोयर आणि कोमल बद्रे यांनी हा प्रकार उघडकीस आणल्यानंतर संपूर्ण जिल्ह्यात खळबळ उडाली होती. या घटनेनंतर पोलिसांनी गंभीर स्वरूपाचा गुन्हा दाखल केला. मात्र, कारवाईची चाहूल लागताच भोजने दाम्पत्य फरार झाले होते.
दरम्यान, अमरावती महानगरपालिकेच्या आरोग्य विभागानेही या प्रकरणाची दखल घेत संबंधित रुग्णालयातील नियमबाह्य कामकाजाच्या आरोपांवर कारवाई केली. रुग्णालयाला सील ठोकण्यात आले होते. दुसरीकडे, पोलीस पथके फरार दाम्पत्याचा शोध घेत होती.
अखेर गोपनीय माहितीच्या आधारे पोलिसांनी दोघांना अटक केली. आता या कथित बाळविक्री प्रकरणात आणखी कोणाचा सहभाग आहे का, तसेच व्यवहारामागे मोठे जाळे कार्यरत होते का, याचा तपास सुरू आहे. अटकेनंतर चौकशीत कोणती माहिती समोर येते, याकडे सर्वांचे लक्ष लागले आहे.
