पुणे : अनैतिक संबंधाच्या संशयातून 17 वर्षीय मुलाचे अपहरण करून त्याला मारहाण केल्याचा धक्कादायक प्रकार पुण्यात समोर आला आहे. या घटनेनंतर दोन दिवसांनी चंदननगर परिसरातील नदीपात्रात या मुलाचा मृतदेह आढळून आला. मुलाचा नदीत पडून मृत्यू झाला की त्याच्यासोबत काही घातपात झाला, याचा तपास बंडगार्डन पोलीस करत आहेत. मुलाच्या आईच्या तक्रारीवरून पोलिसांनी पती-पत्नीसह 6 जणांविरुद्ध गुन्हा दाखल केला आहे.
मिळालेल्या माहितीनुसार, 26 सप्टेंबरच्या रात्री हा अल्पवयीन मुलगा अचानक घरातून बेपत्ता झाला. काहीतरी आमिष दाखवून अज्ञात व्यक्तीने त्याला घेऊन गेल्याची तक्रार त्याच्या आईने बंडगार्डन पोलीस ठाण्यात दाखल केली होती. त्यानंतर पोलीस आणि कुटुंबीयांकडून त्याचा शोध सुरू होता.
दरम्यान, 29 सप्टेंबर रोजी सकाळी 8 वाजण्याच्या सुमारास चंदननगर भागातील नदीपात्रात एका मुलाचा मृतदेह आढळला. तपासादरम्यान तो मृतदेह बेपत्ता झालेल्या 17 वर्षीय मुलाचा असल्याचे समोर आले.
पोलिसांच्या प्राथमिक तपासानुसार, आकाश रेड्डी याला संबंधित मुलगा आपल्या पत्नीशी बोलत असल्याचा संशय होता. याच कारणावरून आकाशने काही साथीदारांच्या मदतीने मुलाला दुचाकीवरून बंडगार्डन बंधाऱ्याजवळील बर्निंग घाट परिसरात नेल्याचा आरोप आहे. तिथे त्याला मारहाण करून धमकावण्यात आल्याचे तपासात समोर आले आहे.
यानंतर घाबरलेला मुलगा तेथून पळू लागला. आरोपींनी त्याचा पाठलाग केल्याचे पोलिसांचे म्हणणे आहे. या वेळी तो नदीत पडला की त्याला नदीत ढकलण्यात आले, याचा तपास सुरू आहे.आकाश रेड्डी, स्वाती रेड्डी, गौरव शिंदे आणि आशिष चाबुकस्वार यांना अटक करण्यात आली आहे. आनंद रेड्डी आणि सूरज उर्फ चन्या मोरे यांच्यावरही गुन्हा दाखल असून पुढील तपास सुरू आहे.
