पुणे : पुण्यातील घोरपडी परिसरातील राष्ट्रीय युद्ध स्मारक चौकात एका भरधाव मिनी स्कूल बसने दुचाकीला जोरदार धडक दिली. बुधवारी सकाळी साडेसातच्या सुमारास घडलेल्या या दुर्दैवी अपघातात 16 वर्षांच्या विद्यार्थ्याचा जागीच मृत्यू झाला, तर त्याची 18 वर्षांची बहीण गंभीर जखमी झाली आहे. या घटनेमुळे संपूर्ण परिसरात हळहळ व्यक्त केली जात आहे.
मिळालेल्या माहितीनुसार, मांजरी परिसरात राहणारी रिया लक्ष्मण कुदळे (वय 18) ही आपली स्कूटर चालवत होती आणि तिचा भाऊ रोहित लक्ष्मण कुदळे (वय 16) मागे बसला होता. दोघेही दुचाकीवरून जात असताना वॉर मेमोरियल चौकात समोरून येणाऱ्या भरधाव मिनी स्कूल बसने त्यांच्या गाडीला उडवले. धडकेमुळे दोघेही रस्त्यावर फेकले गेले. अपघातानंतर स्थानिक नागरिकांनी प्रसंगावधान राखून दोघांनाही तातडीने जवळच्या रुग्णालयात उपचारासाठी दाखल केले.
रुग्णालयात उपचार सुरू असताना रोहितची प्राणज्योत मालवली, तर गंभीर जखमी झालेल्या रियावर सध्या वैद्यकीय उपचार सुरू आहेत. आपल्या सख्ख्या भावाचा डोळ्यांसमोर झालेला हा अपघाती मृत्यू बहिणीसाठी अत्यंत धक्कादायक ठरला आहे.
या अपघाताप्रकरणी रिया कुदळेने दिलेल्या तक्रारीवरून वानवडी पोलीस ठाण्यात बसचालक सागर याच्याविरोधात गुन्हा दाखल करण्यात आला आहे. चालकाने वाहतुकीच्या नियमांचे उल्लंघन करून अतिवेगाने व निष्काळजीपणे गाडी चालवल्याचा ठपका ठेवण्यात आला आहे. पोलीस सध्या या संपूर्ण प्रकरणाचा पुढील तपास करत आहेत.
