बारामती : बारामती नगरपरिषदेच्या मुख्य प्रवेशद्वारासमोर वाहनातून दुर्गंधीयुक्त पाणी, चिखल आणि कुजलेला कचरा ओतून अस्वच्छता निर्माण केल्याप्रकरणी अ‍ॅड. अमोल सातकर यांच्यासह त्यांच्या चार साथीदारांविरोधात बारामती शहर पोलिस ठाण्यात गुन्हा दाखल करण्यात आला आहे. या प्रकारामुळे नगरपरिषदेच्या प्रवेशद्वाराचा परिसर अस्वच्छ झाल्याचा आणि नागरिकांसह कर्मचाऱ्यांच्या ये-जा करण्यात अडथळा निर्माण झाल्याचा आरोप करण्यात आला आहे.
नगरपरिषदेचे प्रभारी मुकादम अक्षय महेश भिवाळ (वय-30) यांनी याप्रकरणी फिर्याद दिली आहे. फिर्यादीनुसार, 30 सप्टेंबर रोजी सकाळी अकराच्या सुमारास अ‍ॅड. अमोल सातकर व त्यांचे चार साथीदार टाटा एसी वाहनातून (एमएच 42 बीयू 8007) कचरा घेऊन नगरपरिषदेच्या आवारात आले. त्यांनी वाहनातील दुर्गंधीयुक्त पाणी, चिखल आणि कुजलेला कचरा थेट मुख्य प्रवेशद्वारासमोर ओतल्याचे फिर्यादीत नमूद करण्यात आले आहे.
यावेळी नगरपरिषदेचे कर्मचारी आणि सुरक्षा रक्षकांनी संबंधितांना रोखण्याचा प्रयत्न केला. मात्र, त्याकडे दुर्लक्ष करून कचरा ओतण्यात आल्याचा आरोप आहे. या प्रकारामुळे प्रवेशद्वार परिसर विद्रूप झाला असून, नागरिक आणि कर्मचाऱ्यांच्या वर्दळीला अडथळा निर्माण झाला. तसेच शासकीय कामात व्यत्यय आल्याचेही फिर्यादीत म्हटले आहे. या प्रकरणी विविध कलमान्वये गुन्हा दाखल करण्यात आला आहे. या घटनेचा पुढील तपास हेड कॉन्स्टेबल विलास मोरे करीत आहेत.
