लोणी काळभोर, ता.1 : ड्युटीनिमित्त सिमला येथे असलेल्या आर्मी जवानाच्या बंद घराचे कुलूप तोडून चोरट्यांनी सोन्याच्या दागिन्यांसह 20 हजार रुपयांची रोकड असा सुमारे 1 लाख 70 हजार रुपयांचा मुद्देमाल लंपास केल्याची घटना घडली आहे. हि घटना लोणी काळभोर (ता. हवेली) ग्रामपंचायत हद्दीतील मोगले वस्ती परिसरात घडली असून 26 सप्टेंबर रोजी सायंकाळी साडेसहा वाजण्याच्या सुमारास उघडकीस आली आहे.
याप्रकरणी आर्मी जवान गुंडू शाहूराज पवार (वय 40, रा. मोगले वस्ती, पोल्ट्री फार्मजवळ, लोणी काळभोर) यांनी लोणी काळभोर पोलीस ठाण्यात तक्रार दाखल केली आहे. त्यानुसार अज्ञात चोरट्याविरुद्ध भारतीय न्याय संहिता (बी एन एस), 2023 – 305,331(1),331(2) प्रमाणे गुन्हा दाखल करण्यात आला आहे. पोलिसांनी दिलेल्या माहितीनुसार, पवार हे आर्मीमध्ये हवालदार पदावर कार्यरत असून सध्या कुटुंबासह जम्मू-काश्मीर बटालियन क्रमांक 1, सिमला येथे कार्यरत आहेत. पवार यांनी सन 2020 मध्ये मोगले वस्ती येथे दोन मजली इमारत बांधली आहे. वरच्या मजल्यावर ते कुटुंबासह राहतात, तर तळमजला भाड्याने दिलेला आहे. ड्युटीवर गेल्यानंतर वरचा मजला बंद असतो.
26 सप्टेंबर रोजी सायंकाळी साडेसहा वाजण्याच्या सुमारास शेजारी राहणाऱ्या कुटुंबातील अडीच वर्षांचे बालक खेळता खेळता पवार यांच्या अंगणात गेले होते. मुलाला घेण्यासाठी त्याची आई पुष्पलता जाधव घराच्या अंगणात गेली असता तिला लोखंडी गेटची कडी तुटलेली आणि दरवाजा अर्धवट उघडा असल्याचे दिसले. तिने ही माहिती पती अविनाश जाधव यांना दिली. त्यानंतर जाधव यांनी तातडीने पवार यांना फोन करून घरफोडीची माहिती दिली. त्यावेळी पवार सिमला येथे ड्युटीवर होते. त्यांनी ही माहिती आपल्या वडिलांना दिल्यानंतर ते दुसऱ्या दिवशी सकाळी लोणी काळभोर येथे पोहोचले.
पवार यांनी वरिष्ठ अधिकाऱ्यांना घरफोडीची माहिती देऊन रजा घेतली आणि 28 सप्टेंबर रोजी पहाटे चारच्या सुमारास ते घरी पोहोचले. घराची पाहणी केली असता लोखंडी गेट, आतील दरवाजाचे कडी-कोयंडे आणि कुलपे तोडलेली आढळली. घरातील लोखंडी कपाटाचे कुलूप लोखंडी कुदळीने वाकवून तोडण्यात आले होते. कपाटातील कपडे व साहित्य अस्ताव्यस्त पडले होते. कपाटात ठेवलेल्या दागिन्यांची आणि पैशांची पाहणी केली असता 5 ग्रॅम वजनाची सोन्याची अंगठी, 4 ग्रॅम वजनाची सोन्याची अंगठी, 1 ग्रॅम वजनाच्या लहान मुलाच्या कानातील दोन काड्या आणि 20 हजार रुपये रोख असा मुद्देमाल गायब असल्याचे निदर्शनास आले.
दरम्यान, अज्ञात चोरट्यांनी 15 सप्टेंबर रोजी दुपारी एक ते 26 सप्टेंबर रोजी पहाटे चार वाजण्याच्या दरम्यान घर बंद असल्याची संधी साधून कुलूप तोडले आणि घरात प्रवेश करून कपाटातील दागिने व रोकड चोरून नेली. अशी फिर्याद पवार यांनी लोणी काळभोर पोलीस ठाण्यात दिली आहे. त्यानुसार अज्ञात चोरट्याविरुद्ध गुन्हा दाखल करून तपास सुरू केला आहे. बंद घराची रेकी करून चोरी करण्यात आली की चोरट्यांनी संधी साधली, याचा तपास पोलिसांकडून करण्यात येत आहे.
