पुणे : पुणे-सोलापूर महामार्गावरील शेवाळेवाडी ते मांजरी दरम्यान पडलेल्या मोठ्या खड्ड्यांमुळे वाहनचालकांना प्रचंड मनस्ताप सहन करावा लागत होता. या धोकादायक खड्ड्यांमुळे परिसरात लहान-मोठे अपघात होऊन काहींना आपले प्राण गमवावे लागले, तर अनेकांना पाठीच्या व मणक्याच्या आजारांना सामोरे जावे लागत आहे. स्थानिक नागरिकांनी वारंवार तक्रारी करूनही प्रशासनाकडून कोणतीही हालचाल होत नसल्याने नागरिकांमध्ये तीव्र असंतोष निर्माण झाला होता.
या गंभीर समस्येची दखल घेत भाजपचे जिल्हा उपाध्यक्ष राहुल शेवाळे यांनी पुढाकार घेतला. त्यांनी पुणे महापालिकेचे आयुक्त नवल किशोर राम यांची प्रत्यक्ष भेट घेऊन परिस्थितीचे गांभीर्य लक्षात आणून दिले. महापालिकेत नव्याने समाविष्ट झालेल्या ग्रामीण भागातील रस्त्यांची दुरवस्था आणि विशेषतः सोलापूर रस्त्यावरील खड्ड्यांचे वास्तव त्यांनी आयुक्तांसमोर मांडले. हा रस्ता राष्ट्रीय महामार्ग प्राधिकरणाकडून पुणे महापालिकेच्या ताब्यात वर्ग करण्यात यावा आणि लवकरात लवकर दर्जेदार दुरुस्ती केली जावी, अशी ठाम मागणी त्यांनी या वेळी केली.
या बैठकीत आयुक्त नवल किशोर राम यांनी नागरिकांच्या अडचणी समजून घेत संबंधित पथ विभागाला तातडीने खड्डे बुजवून रस्ता दुरुस्त करण्याचे स्पष्ट निर्देश दिले. प्रशासनाच्या या सकारात्मक भूमिकेमुळे शेवाळेवाडी आणि मांजरी परिसरातील नागरिकांना लवकरच खड्ड्यांपासून मुक्ती मिळून मोठा दिलासा मिळण्याची शक्यता निर्माण झाली आहे.
या महत्त्वाच्या बैठकीस उपायुक्त प्रसाद काटकर आणि पथ विभागाचे उपायुक्त राजेश बनकर यांच्यासह सिद्धार्थ शेवाळे, प्रशांत वाघ, स्वप्नील मोरे, कुशल मोरे, मनोज वाघ व शुभम हरपळे हे उपस्थित होते. राहुल शेवाळे यांच्या या प्रयत्नांमुळे अनेक दिवसांपासून रडखडलेला रस्त्याचा प्रश्न सुटण्याच्या मार्गावर असल्याने परिसरातील नागरिकांनी समाधान व्यक्त केले आहे.
