पुणे : दिवाळीच्या पार्श्वभूमीवर पुणे शहराच्या मध्यवर्ती भागातील बाजारपेठांमध्ये खरेदीसाठी नागरिकांची मोठी गर्दी होत आहे. लक्ष्मी रोड, कुमठेकर रोड, केळकर रोड आणि तुळशीबाग परिसरात नागरिकांची वर्दळ वाढत असल्याने वाहतूक कोंडी टाळण्यासाठी आणि पादचाऱ्यांच्या सुरक्षिततेसाठी बाजीराव रोड व छत्रपती शिवाजी महाराज रोडवर शनिवारी आणि रविवारी जड वाहनांच्या वाहतुकीला बंदी घालण्यात आली आहे. दिवाळीचा सण संपेपर्यंत ही बंदी लागू राहणार आहे.
यापूर्वी शनिवारी आणि रविवारी बांधकाम क्षेत्राशी संबंधित वाहने तसेच मालवाहू वाहनांना शहरातील प्रमुख रस्त्यांवरून वाहतूक करण्यासाठी देण्यात आलेली परवानगी तात्पुरती रद्द करण्यात आली आहे. दिवाळीनिमित्त मध्यवर्ती बाजारपेठांमध्ये खरेदीसाठी होणारी गर्दी लक्षात घेऊन वाहतूक शाखेने हा निर्णय घेतला आहे.
वाहतूक शाखेचे पोलीस उपायुक्त डॉ. संदीप भाजीभाकरे यांनी यासंदर्भात आदेश दिले आहेत. २५ ऑक्टोबरपासून या निर्णयाची अंमलबजावणी सुरू झाली असून, दिवाळी संपेपर्यंत प्रत्येक शनिवार आणि रविवारी पूर्ण दिवस जड वाहनांना या दोन्ही मार्गांवरून वाहतूक करता येणार नाही.
या निर्बंधांमध्ये ट्रक, डंपर, मिक्सर, ट्रेलर आणि जड मालवाहू वाहनांचा समावेश आहे. त्यामुळे संबंधित वाहनचालकांनी पर्यायी मार्गांचा वापर करावा आणि वाहतूक पोलिसांच्या सूचनांचे पालन करावे, असे आवाहन करण्यात येत आहे.
दिवाळीच्या काळात मध्यवर्ती पुण्यात खरेदीसाठी येणाऱ्या नागरिकांना वाहतूक कोंडीचा सामना करावा लागू नये, तसेच बाजारपेठांमधील वाहतूक आणि पादचाऱ्यांची ये-जा सुरळीत राहावी, यासाठी हे निर्बंध लागू करण्यात आले आहेत.
