पुणे: विद्येचं माहेरघर म्हणून ओळखल्या जाणाऱ्या पुण्यातून माणुसकीला काळीमा फासणाऱ्या घटना समोर येत आहेत. नसरापूर येथील 4 वर्षीय चिमुकलीवर झालेला बलात्कार आणि हत्येची घटना ताजी असतानाच, सोरतापवाडी भागात अल्पवयीन मुलीवर एकाने बलात्कार केल्याचे समोर आले आहे.
हवेली तालुक्यातील सोरतापवाडी परिसरात एका नर्सरीत काम करणाऱ्या अल्पवयीन मुलीवर बलात्कार केल्याची धक्कादायक घटना घडली आहे. या प्रकरणी आकाश रामहरी ओव्हाळ आणि त्याचा साथीदार अभिजीत खंडागळे अशी अटक करण्यात आलेल्या आरोपींची नावे आहेत.
समोर आलेल्या माहितीनुसार, यातील एक आरोपी गेल्या काही दिवसांपासून पीडित मुलीचा पाठलाग करून तिला मानसिक त्रास देत होता. तर घटनेच्या दिवशी नराधमांनी तरुणीला निर्जन स्थळी, मातीच्या ढिगाऱ्याच्या आडोशाला ओढून नेले आणि एकाने तिच्यावर अत्याचार केला.
पिडीतेने जबाबात सांगितले कि, अभिजीत खंडागळे याने मला बोलावून घेतले व आकाश रामहरी ओव्हाळ याने मला जबरदस्तीने मातीच्या ढिगाऱ्याच्या आडोशाला अंधारात नेले. तिथे माझे कपडे काढून आणि तोंड दाबून माझ्या इच्छेविरुद्ध माझ्यावर जबरदस्तीने बलात्कार केला. तसेच, ‘तुझ्या मामाला बघून घेतो’ अशी धमकीही मला दिली आहे.
पोलिसांनी दोन्ही आरोपींवर भारतीय न्याय संहिता कलम 64 (1) पोक्सो, 74,351 (2) 3, (5) कायद्यांतर्गत गुन्हा दाखल करत बेड्या ठोकल्या आहेत. या घटनांमुळे पुणेकरांमध्ये संतापाची लाट असून, आरोपींना कठोर शिक्षा व्हावी, अशी मागणी जोर धरत आहे.
