Yavat News यवत , ता. ८ : शेताच्या बांधावरून सुरू असलेल्या वादाने हिंसक वळण घेतल्याची धक्कादायक घटना उघडकीस आली आहे. ट्रॅक्टरने पाण्याची पाईपलाईन फोडल्याचा जाब विचारणाऱ्या शेतकऱ्यावर त्याच्याच चुलत भावाने लाकडी काठीने डोक्यात जबर मारहाण केल्याची घटना घडली आहे. ही घटना पिलानवाडी (ता. दौंड) येथे ५ मे रोजी सकाळी सातच्या सुमारास घडली आहे. या मारहाणीत गंभीर जखमी झालेल्या शेतकऱ्यावर सध्या बोरीपार्धी येथील निरामय हॉस्पिटलमध्ये उपचार सुरू आहेत. Yavat News
विजय गुलाब कदम असे गुन्हा दाखल करण्यात आलेल्या आरोपीचे नाव आहे. याप्रकरणी संतोष उत्तम कदम (वय ४२, रा. पिलानवाडी, राहू, ता. दौंड) यांनी यवत पोलिस ठाण्यात फिर्याद दिली आहे. पोलिसांनी दिलेल्या माहितीनुसार, संतोष कदम हे शेती व्यवसाय करून कुटुंबाचा उदरनिर्वाह करतात. संतोष कदम हे घराच्या पाठीमागे ट्रॅक्टरचा आवाज आल्याने ते शेताकडे गेले. त्यावेळी त्यांचा चुलत भाऊ विजय गुलाब कदम हा ट्रॅक्टरच्या सहाय्याने शेताच्या बांधालगत नांगरणी करत होता. याच वेळी संतोष कदम यांच्या घराजवळील पाण्याची पाईपलाईन फुटलेली दिसून आली. Yavat News
याबाबत संतोष कदम यांनी विजय कदम याला जाब विचारला असता त्याने शिवीगाळ करत दमदाटी सुरू केली. “तुझा काही संबंध नाही,” असे म्हणत वाद वाढला. संतोष कदम यांनी “ही माझी शेती आणि माझा बांध आहे,” असे सांगितल्यावर संतापलेल्या विजय कदम याने जवळ पडलेली लाकडी काठी उचलून संतोष कदम यांच्या डोक्यात जोरदार प्रहार केला. या हल्ल्यात संतोष कदम गंभीर जखमी होऊन खाली कोसळले. त्यानंतर आरोपीने पुन्हा धमक्या देत घटनास्थळावरून पलायन केले.
जखमी अवस्थेत संतोष कदम यांनी प्रथम यवत येथील सरकारी रुग्णालयात उपचार घेतले. मात्र, डॉक्टरांनी सिटी स्कॅन करण्याचा सल्ला दिल्याने त्यांना पुढील उपचारासाठी बोरीपार्धी येथील निरामय हॉस्पिटलमध्ये दाखल करण्यात आले आहे. या प्रकरणी यवत पोलिस ठाण्यात विजय गुलाब कदम याच्याविरोधात भारतीय न्याय संहिता २०२३ अंतर्गत कलम ११८(२), ३५१(२), ३५१(३) आणि ३५२ अन्वये गुन्हा दाखल करण्यात आला असून पुढील तपास सुरू आहे. Yavat News
