आदित्य बोराटे
पुणे: नागपंचमीच्या पार्श्वभूमीवर नागरिक, दुचाकीस्वार तसेच पक्षी आणि प्राण्यांच्या सुरक्षेला धोका निर्माण करणाऱ्या प्रतिबंधित चायनीज नायलॉन मांजाविरोधात इंदापूर नगरपरिषदेने कारवाईची मोहीम तीव्र केली आहे. गेल्या दहा दिवसांपासून सुरू असलेल्या या मोहिमेअंतर्गत सोमवारी (ता. १७) विविध ठिकाणी तपासणी करून हजारो रुपयांचा प्रतिबंधित नायलॉन मांजा जप्त करण्यात आला.
नायलॉन मांजाची छुप्या पद्धतीने तसेच ऑनलाइन माध्यमातून विक्री व खरेदी होत असल्याच्या पार्श्वभूमीवर नगरपरिषदेच्या पथकाने शहरातील विविध ठिकाणी तपासणी केली. मुख्याधिकारी रमेश ढगे यांच्या मार्गदर्शनाखाली आरोग्य विभाग प्रमुख अनिरुद्ध चव्हाण, सहाय्यक आरोग्य निरीक्षक सुनील लोहिरे, लिलाचंद पोळ, मुकादम दत्तात्रय ढावरे, अशोक अडसूळ, अशोक चिंचकर, दीपक शिंदे यांच्या नेतृत्वाखाली नगरपरिषद कर्मचाऱ्यांनी ही कारवाई केली.
यावेळी लक्ष्मण लोखंडे, ओंकार साळुंखे, सिद्धार्थ मखरे, कुणाल चव्हाण, अमित मखरे, महेश मखरे आदी कर्मचाऱ्यांनी विविध ठिकाणी तपासणी केली. या कारवाईत मोठ्या प्रमाणात प्रतिबंधित चायनीज नायलॉन मांजा जप्त करण्यात आला.
नगरपरिषदेने यापूर्वीच अनेक दुकानदारांना नोटिसा बजावून नायलॉन मांजाची विक्री, साठवणूक आणि वापर करू नये, याबाबत सूचना दिल्या आहेत. तसेच शहरात जनजागृती मोहीम राबवून नागरिकांना प्रतिबंधित मांजाच्या वापरापासून दूर राहण्याचे आवाहन करण्यात आले आहे. मांजाच्या विक्रीसंदर्भात विविध दुकानांची तपासणीही करण्यात आली आहे.
नायलॉन मांजामुळे दुचाकीस्वार आणि नागरिक जखमी होण्याबरोबरच पक्ष्यांच्या जीवितालाही धोका निर्माण होण्याची शक्यता आहे. त्यामुळे प्रतिबंधित मांजाची विक्री, साठवणूक किंवा वापर होत असल्याचे निदर्शनास आल्यास नागरिकांनी प्रशासनाला माहिती द्यावी, असे आवाहन नगरपरिषदेने केले आहे. प्रतिबंधित नायलॉन मांजाविरोधातील कारवाई यापुढेही सुरूच राहणार असल्याचे मुख्याधिकारी रमेश ढगे यांनी स्पष्ट केले.
