पुणे : पुण्याहून रविवारी (13 सप्टेंबर) ट्रेनने प्रवास आखत असाल, तर प्रवासाला निघण्यापूर्वी ही बातमी नक्की वाचा. पुणे रेल्वे स्थानकातील यार्डमध्ये महत्त्वाच्या तांत्रिक कामांसाठी मध्य रेल्वेने सकाळी 8 ते सायंकाळी 5 या वेळेत 9 तासांचा मेगा ब्लॉक जाहीर केला आहे.त्यामुळे अनेक गाड्या रद्द करण्यात आल्या आहेत.
रद्द करण्यात आलेल्या गाड्या
डेक्कन एक्सप्रेस: मुंबई-पुणे आणि पुणे-मुंबई डेक्कन एक्सप्रेस.
लोकल सेवा: पुणे-तळेगाव, तळेगाव-पुणे, पुणे-लोणावळा आणि लोणावळा-शिवाजीनगर लोकल.
डेमू ट्रेन: पुणे-दौंड डेमू सेवा पूर्णपणे बंद राहील.
इतर स्थानकांवर थांबणाऱ्या गाड्या
स्थानकातील गर्दी टाळण्यासाठी आणि कामाचा खोळंबा होऊ नये म्हणून काही गाड्या पुणे मुख्य स्टेशनऐवजी आधीच्या स्थानकांवरच थांबवल्या जातील:
खडकी व हडपसर: जयपूर-पुणे, नागपूर-पुणे, अमरावती-पुणे आणि मुंबई-पुणे एक्सप्रेस या गाड्यांचा प्रवास हडपसर किंवा खडकी स्थानकावरच संपेल. परतीच्या प्रवासासाठी या गाड्या याच स्थानकांपासून रवाना होतील.
शिवाजीनगर व दौंड: लोणावळा-पुणे लोकल शिवाजीनगरपर्यंतच धावेल, तर बारामती-पुणे डेमूचा प्रवास दौंड येथेच थांबवला जाईल.
पुणे-दौंड मार्गावरील पुणे यार्डात डी.डी.एस. पॉईंटचे आधुनिकीकरण केले जाणार आहे. जुन्या रुळांच्या जागी अधिक क्षमतेचे नवीन 60 किलोचे रेल्वे मार्ग बसवण्यात येणार आहेत. यासाठी विशेष वाहतूक व वीज ब्लॉक घेण्यात येत असल्याने प्लॅटफॉर्म क्रमांक 1, अप मेन लाईन आणि सीएसएमटी कडील डाऊन मेन लाईनवरील वाहतूक पूर्णपणे बंद राहील.
रविवारी प्रवास करताना कोणताही गोंधळ किंवा गैरसोय टाळण्यासाठी प्रवाशांनी घर सोडण्यापूर्वी रेल्वेचे अधिकृत वेळापत्रक व गाड्यांची माहिती तपासूनच बाहेर पडावे, असे आवाहन रेल्वे प्रशासनाकडून करण्यात आले आहे.
