पुणे, ता. 12 : पुणे शहरासह पिंपरी-चिंचवड आणि इतर जिल्ह्यांतून दुचाकी चोरी करणाऱ्या टोळीचा विश्रामबाग पोलिसांनी पर्दाफाश केला आहे. तपास पथकाने विधीसंघर्षित बालकासह एका आरोपीला ताब्यात घेतले असून, एकाला अटक केली आहे. आरोपींकडून तब्बल 10 लाख रुपये किमतीच्या 14 चोरीच्या मोटारसायकली जप्त करण्यात आल्या आहेत. कृष्णा चंद्रकांत शेळके (वय 26, रा.अहमदपूर लातूर) असे अटक आलेल्या आरोपीचे नाव आहे.
विश्रामबाग पोलीस ठाण्याच्या हद्दीतील नवीन पेठ येथून होंडा शाईन दुचाकी (एमएच 37 एबी 3872) चोरीला गेल्यानंतर वाहनमालकाने पोलिसांत तक्रार दाखल केली होती. याप्रकरणी भारतीय न्याय संहिता कलम 303 (2) अन्वये गुन्हा दाखल करण्यात आला.वरिष्ठ पोलीस निरीक्षक नवनाथ जगताप यांच्या मार्गदर्शनाखाली तपास पथकाचे प्रभारी सहायक पोलीस निरीक्षक उमेश कारके यांनी पथकासह गुन्ह्याचा समांतर तपास सुरू केला. तपासादरम्यान पोलिसांना दोन संशयित दुचाकीचोर नारायण पेठ परिसरात असल्याची गोपनीय माहिती मिळाली. त्यानुसार पोलिसांनी तेथे सापळा रचला. दोन संशयित मुले आढळल्यानंतर पोलिसांनी त्यांना ताब्यात घेण्याचा प्रयत्न केला. त्यातील एकजण अंधाराचा फायदा घेत गल्लीबोळातून पसार झाला; मात्र दुसऱ्या संशयिताला दुचाकीसह ताब्यात घेण्यात आले.
चौकशीदरम्यान तो विधीसंघर्षित बालक असल्याचे निष्पन्न झाले. नातेवाईकांच्या उपस्थितीत त्याच्याकडे चौकशी केली असता, त्याने साथीदाराच्या मदतीने पुणे व इतर ठिकाणांहून दुचाकी चोरी केल्याची माहिती दिल्याचे पोलिसांनी सांगितले. तपासात चोरीच्या दुचाकींपैकी दोन दुचाकी अहमदपूर, लातूर येथील कृष्णा शेळके याला विकल्याचे समोर आले. त्यानंतर विश्रामबाग पोलिसांनी लातूर येथे जाऊन शेळके याला ताब्यात घेतले आणि गुन्ह्यात अटक केली.
12 गुन्ह्यांचा छडा
पोलिसांच्या तपासात आरोपींकडून विश्रामबाग पोलीस ठाण्याच्या हद्दीतील 2 वाहनचोरीचे गुन्हे उघडकीस आले. याशिवाय समर्थ, हडपसर, भारती विद्यापीठ, विमानतळ आणि काळेवाडी पोलीस ठाण्यांतील प्रत्येकी एक, असे पुणे शहर व पिंपरी-चिंचवड आयुक्तालयातील 7 गुन्हे उघडकीस आले आहेत. तसेच इतर जिल्ह्यांतील 5 वाहनचोरीचे गुन्हेही उघडकीस आल्याचे पोलिसांनी सांगितले. अशा प्रकारे आतापर्यंत एकूण 12 गुन्ह्यांचा छडा लावण्यात तपास पथकाला यश आले आहे. आणखी दोन दुचाकींच्या चोरीबाबत तपास सुरू आहे.
10 लाखांचा मुद्देमाल हस्तगत
विधीसंघर्षित बालक आणि त्याच्या साथीदारांकडून विविध कंपन्यांच्या 14 चोरीच्या मोटारसायकली जप्त करण्यात आल्या असून, त्यांची अंदाजे किंमत 10 लाख रुपये आहे. वाहनचोरीतील आणखी एका फरार आरोपीचा शोध सुरू असून, या टोळीशी संबंधित आणखी गुन्हे उघडकीस येण्याची शक्यता पोलिसांनी व्यक्त केली आहे.
सदरची कारवाई पोलीस आयुक्त अमितेश कुमार, पोलीस सह आयुक्त संजय दराडे, अप्पर पोलीस आयुक्त राजेश बनसोडे, पोलीस उप-आयुक्त कृषीकेश रावले, सहाय्यक पोलीस आयुक्त अनुजा देशमाने, विश्रामबाग पोलीस ठाण्याचे वरिष्ठ पोलीस निरीक्षक नवनाथ जगताप, पोलीस निरीक्षक, गुन्हे, विकास भिंगारदिवे व रमेश लाहिगुडे यांच्या मार्गदर्शनाखाली तपास पथकाचे प्रभारी अधिकारी सहाय्यक पोलीस निरीक्षक उमेश कारके, पोलीस उप निरीक्षक सत्यवान गेंड, पोलीस उपनिरीक्षक मेहबुब मोकाशी, पोलीस हवालदार नितीन मुंढे, अमोल भोसले, महेश कदम, शैलेश सुर्वे, सचिन अहिवळे, शशीकांत दरेकर, कैलास डुकरे, जाकीर मणियार, अनिस शेख, शिवदत्त गायकवाड, सागर मोरे, अर्जुन थोरात, भास्कर गायकवाड, उमेश गव्हाणे यांच्या पथकाने केले आहे.
