पुणे : वाहनांवर HSRP म्हणजेच हाय सिक्युरिटी रजिस्ट्रेशन प्लेट बसवण्याबाबत परिवहन विभागाने आता कठोर भूमिका घेतली आहे. अनेकदा मुदतवाढ देऊनही मोठ्या संख्येने वाहनांवर अद्याप HSRP प्लेट बसवण्यात आलेली नाही. त्यामुळे अशा वाहनांची तपासणी करण्यासाठी परिवहन विभागाने विशेष पथके तयार केली असून, रस्त्यावर कारवाईला सुरुवात होण्याची शक्यता आहे.
परिवहन विभागाच्या माहितीनुसार, राज्यात आतापर्यंत 1 कोटी 10 लाख 84 हजार वाहनधारकांनी HSRP प्लेटसाठी नोंदणी केली आहे. त्यापैकी 98 लाख 08 हजार वाहनांवर प्लेट बसवण्यात आली आहे. मात्र, अजूनही मोठ्या संख्येने वाहनधारकांनी या प्रक्रियेकडे दुर्लक्ष केले आहे.
HSRP नसलेल्या किंवा जुन्या पद्धतीच्या नंबर प्लेट वापरणाऱ्या वाहनांवर विशेष पथकांकडून लक्ष ठेवले जाणार आहे. विविध रस्ते, चौक आणि तपासणी नाक्यांवर वाहनांची तपासणी केली जाऊ शकते. त्यामुळे वाहनधारकांनी आपल्या वाहनाची HSRP प्लेट बसवली आहे की नाही, याची खात्री करणे महत्त्वाचे ठरणार आहे.
HSRP ही सामान्य नंबर प्लेटपेक्षा अधिक सुरक्षित स्वरूपाची असते. अॅल्युमिनियमपासून तयार केलेल्या या प्लेटवर अशोकचक्राचा होलोग्राम, लेझरने तयार केलेला ओळख क्रमांक आणि ‘IND’ अशी खूण असते. वाहनाच्या नोंदणी क्रमांकातील अक्षरे आणि अंक विशेष पद्धतीने उमटवलेले असतात.
या प्रणालीमुळे वाहनाची ओळख निश्चित करण्यात मदत होते. बनावट नंबर प्लेटचा वापर, वाहन चोरी आणि गुन्ह्यांमध्ये वाहनांचा गैरवापर यावर नियंत्रण ठेवण्यासाठी HSRP उपयुक्त ठरू शकते. प्लेटवरील विशिष्ट क्रमांक, चिन्हांमुळे वाहनाची माहिती तपासणे अधिक सोपे होते. त्यामुळे HSRP न बसवलेल्या वाहनधारकांनी पुढील कारवाई टाळण्यासाठी लवकरात लवकर प्रक्रिया पूर्ण करण्याचे आवाहन परिवहन विभागाकडून केले जात आहे.
