लोणी काळभोर, ता. १३ : राज्य परिवहन महामंडळाच्या (एसटी) सवलतीच्या प्रवास योजनेचा लाभ अधिकाधिक नागरिकांपर्यंत पोहोचावा, यासाठी शिवसेना (उद्धव बाळासाहेब ठाकरे) पक्षाच्या वतीने कुंजीरवाडी (ता. हवेली) येथे आयोजित करण्यात आलेल्या तीन दिवसीय राष्ट्रीय सामायिक गतिशीलता कार्ड नोंदणी शिबिराला नागरिकांचा उत्स्फूर्त प्रतिसाद मिळाला. या शिबिरातून तब्बल १,२६० महिला व ज्येष्ठ नागरिकांनी एनसीएमसी कार्डासाठी नोंदणी करून लाभ घेतला. अशी माहिती हवेली तालुका शिवसेना प्रमुख स्वप्नील कुंजीर यांनी दिली आहे.
एसटी महामंडळाच्या विविध सवलतीच्या योजनांचा लाभ घेण्यासाठी एनसीएमसी(राष्ट्रीय सामायिक गतिशीलता कार्ड) आवश्यक असल्याने अनेक महिला व ज्येष्ठ नागरिकांना कार्ड काढण्यासाठी शहरात जावे लागत होते. ही गैरसोय लक्षात घेऊन शिवसेनेच्या वतीने स्थानिक पातळीवर विशेष शिबिराचे आयोजन करण्यात आले होते. शिबिरादरम्यान नागरिकांना एनसीएमसी कार्ड नोंदणी, आवश्यक कागदपत्रांची पूर्तता, मार्गदर्शन आणि अर्ज प्रक्रिया याबाबत मदत करण्यात आली. त्यामुळे ग्रामीण भागातील महिला आणि ज्येष्ठ नागरिकांना मोठा दिलासा मिळाला.
या उपक्रमाबाबत माहिती देताना हवेली तालुका शिवसेना प्रमुख स्वप्नील कुंजीर यांनी सांगितले की, “सामान्य नागरिकांना शासकीय योजनांचा लाभ सहज मिळावा, यासाठी पक्षाच्या वतीने सातत्याने प्रयत्न केले जात आहेत. एनसीएमसी कार्डासाठी आयोजित केलेल्या या शिबिराला नागरिकांचा मोठा प्रतिसाद मिळाला असून १,२६० महिला व ज्येष्ठ नागरिकांनी याचा लाभ घेतला आहे.”
दरम्यान, या उपक्रमामुळे परिसरातील नागरिकांनी समाधान व्यक्त करत आयोजकांचे आभार मानले. ग्रामीण भागातील नागरिकांना शासकीय सुविधांशी जोडणारा हा उपक्रम ठरल्याची भावना लाभार्थ्यांनी व्यक्त केली.
